蜜蜂兵團再炒辛尼特

猪拉多纳

歐聯搏殺 針針見血

歐聯16強次回合，德甲「蜜蜂兵團」多蒙特主場迎戰俄超辛尼特，多蒙特首回合作客取得4比2領先優勢，呢班波近兩季將注意力集中喺歐聯，今晚又有中場靈魂馬高列奧斯傷愈復出，有力再炒完全不在狀態嘅辛尼特，黑柴再追讓球主勝。

（有線62及202台周四凌晨3時45分直播）

多蒙特啱啱喺德甲主場以1比2輸畀慕遜加柏，聯賽榜已落後拜仁23分，聯賽冇機會爭霸，但多蒙特實力又比起其他德甲球隊高一皮，所以即使傷兵滿營同經常失分，目前仍然保住第二位置。事實上教練高普上季就意識到拜仁實力太強，想爭德甲錦標難度太高，因而更重視歐聯比賽，佢哋今季已經試過四次喺歐聯前夕聯賽輸波，前三次跟手都喺歐聯賽事取得勝利，包括16強首回合前吞漢堡三蛋，跟住作客俄羅斯贏4比2，今次輸畀慕遜加柏在先，好可能係歐聯大勝嘅先兆。
馬高列奧斯強勢回歸

多蒙特陣中雖然有蘇保迪、施雲賓達、根度簡同巴拉斯塞高斯基等傷兵，但靈魂人物馬高列奧斯可以傷愈復出，球隊近兩場聯賽冇咗佢，前線即刻倒瀉籮蟹，今晚有番佢火力回復，多蒙特眾將賽前紛紛表示目前尚未出線，今晚絕對唔會鬆懈喎。

俄超辛尼特本身人腳唔曳，但整體表現奇差，除咗係16強隊伍之中踢分組賽得分最低球隊外，經過歇冬期佢哋更加係完全失去狀態，首回合輸咗畀多蒙特後，聯賽主場面對弱旅杜莫斯只能互交白卷，賽後會方即時解僱意大利籍教頭史巴列堤，由助教施馬克做臨時教練，不過呢位前俄羅斯國家隊隊長根本冇執教一隊經驗，佢上任後首仗帶領辛尼特作客莫斯科中央陸軍，喺全場捱打下輸咗0比1，賽後被傳媒彈到體無完膚。意大利國腳左閘基斯薛圖災難性表現更成為輸波罪人，以佢哋目前狀態，作客西法倫球場凶多吉少。
歐聯密碼

0:辛尼特史上從未入過歐聯8強。

3:辛尼特今屆歐聯3場作客都能取得入球。

4:連上周不敵慕遜加柏，多蒙特近4次出戰歐聯前均於本土聯賽輸波，但之前3次於接着歐聯均順利贏波。

10:多蒙特近2屆於主場踢了9場歐聯賽事，共取得8勝1負，唯一輸波是今屆分組賽0比1不敵阿仙奴。