曼聯搵番團火先有價講

猪拉多纳

呢兩個禮拜好多人關注兩件事，馬航客機事件同莫耶斯係咪被炒，Peter比較正面，凡事希望有奇迹，馬航客機如是，曼聯爭取歐聯晉級8強亦係咁話，最緊要運氣幫到手。
貌合神離邊有運行

紅魔鬼首回合作客落後0比2，要晉級最重要唔係靠莫耶斯帶領，又或者個別球員突然大發神威，睇嚟最緊要有運氣。睇番周日曼聯輸畀利物浦場波，正選11人陣容唔比費格遜執教年代任何一場差，但Peter睇到就係球員眼入面冇咗團火，決心不足，踢到貌合神離，輸三球十二碼都係「神推鬼撞」，正正係唔夠集中精神所致。

曼聯今晚要喺歐聯死裏逃生，主場對奧林比亞高斯起碼要淨勝兩球或以上先有價講，鬥志係必然嘅條件，如果成班球員都依然踢到死吓死吓，冇厘神氣，幸運之神又點會眷顧你呢？
金句：紅魔要歐聯晉級 運氣要夠至得