博多蒙特「讓主」冇辛苦

猪拉多纳

聯賽輸完歐聯例Win

德甲輸波，歐聯必勝﹖多蒙特喺德甲雖則連拜仁嘅「車尾燈」都見唔到，但佢哋近幾次喺聯賽輸波之後，緊接出戰歐聯竟然全部贏晒。「蜜蜂兵團」今晚歐聯16強次回合迎戰辛尼特前，咁啱得咁蹺又試喺聯賽輸波，隨時係大勝先兆，一於捧1.74倍「讓主」。

（有線62及202台周四凌晨3:45直播）

多蒙特喺歐聯分組賽最後兩輪擊敗拿玻里同馬賽之前，分別喺德甲輸畀拜仁慕尼黑同利華古遜，至於16強首回合作客以4:2砌低辛尼特前，佢哋亦喺聯賽淨吞漢堡3蛋，「輸德甲贏歐聯」呢個定律唔到你唔信，難怪唔少傳媒都講笑咁話，「蜜蜂兵團」喺上輪「保路西亞打吡」不敵慕遜加柏，對於今場嚟講未必係「壞事」。
馬高列奧斯復出

當然啦，筆者點會聽到呢個「魔咒」，就盲舂舂揀「讓主」吖。以波論波，多蒙特缺少巴拉斯塞高斯基、蘇保迪等幾員主將，首回合都能夠大勝而回，今晚返到自己地頭出戰，除咗有馬高列奧斯克服肌肉傷患，復出機會唔細，上輪聯賽要坐波監嘅米希達利恩，亦得以為今仗養精蓄銳。兩人夥拍羅拔利雲度夫斯基嘅「進攻鐵三角」，喺首回合玩到辛尼特班後防陀陀擰，夾手夾腳攻入4球，今場繼續聯袂攻堅，邊使怕冇波入。
辛尼特易帥保亞斯接手

更何況辛尼特今非昔比，喺俄超歇冬後戰績曳爆，搞到功勳教頭史巴列堤喺上星期被炒，尋晚雖則落實由前熱刺主帥保亞斯接手，但佢未嚟得切上工，今仗仍然由助教施馬克領軍。施馬克喺職業生涯踢過唔少俄超勁旅，可惜講到領軍經驗只屬「新丁」，上輪處子戰領軍作客不敵莫斯科中央陸軍外，仲失驚無神褫奪盧柏迪斯嘅隊長臂章，改由右閘安約高夫擔任，真係愈攪愈亂。至於首回合受傷被換走嘅艾沙維，要抖到月底至有望復出，傷愈冇耐嘅丹尼艾維斯又嚴重缺態，加上球隊處於過渡期，今晚造訪德國難講惡。
Data King：多蒙特近5次對俄軍不敗

‧多蒙特近6次主場出戰歐聯，其中5場每場最少攻入3球。

‧多蒙特近11場歐聯賽事，僅得1場保持不失球。

‧「蜜蜂兵團」近5次與俄羅斯球會交鋒未輸過，取得4勝1和佳績。
乜都玩錦囊：玩埋1.43倍入球大

多蒙特喺主場出戰歐聯例牌搶韁，近6場有5場最少攻入對手3粒，加上佢哋喺近11場歐聯比賽，只有1場能夠保持清白之身，簡直係大盤客恩物，今場一於熱食1.43倍入球大。