熱刺失晒魂難擋賓菲加

猪拉多纳

有時踢波唔係齋講實力，士氣都好重要，今晚歐霸16強次回合賓菲加主場鬥哀兵熱刺，後者人腳質素無疑秤先少少，但從首回合輸1比3之役，睇到熱刺隊波軍心渙散，個個踢到頭耷耷。日前佢哋於北倫敦打吡諗住打爭氣波，點知開波冇耐就落後阿仙奴一粒，之後圍住嚟揼又把握唔到，少帥舒活去到末段先派出蘇爾達杜改踢雙箭頭，都為時已晚。唔經唔覺熱刺近7仗輸咗5場，睇得出舒活臨場指揮冇乜板斧，又冇辦法振奮軍心，上仗佢仲發神經，大力將個波掟落阿仙奴右閘沙格拿度，連主帥都咁心浮氣躁，難怪班波陷入信心危機。

人衰行路打倒褪，熱刺本身有戴臣、基利捷斯、基爾獲加等傷兵，依家中堅卡保奧亦話可能缺陣，加上維頓漢要坐波監，搞到今仗鬧後衞荒，隨時要搵防中辛度雲尼亞里移後頂住檔，加上箭頭艾迪巴約已經五場冇士哥，勢頹兼殘陣，邊有本錢淨勝3粒反勝出線呀？
「里斯本雄鷹」近況勁到癲

相反賓菲加不但喺葡超遙遙領先，之前20場正式比賽贏足19仗，塞爾維亞新星拿沙馬高域首回合演出Sharp醒，拍住洛迪高摩連奴可謂如魚得水，仲有奧斯卡卡度素及洛迪高利馬等輪流發威，信心可謂爆棚，同喺谷底掙扎嘅熱刺形成強烈對比。寧買當頭起，「里斯本雄鷹」勢頭咁勁，相信熱刺好難收復失地，度士認為無謂拗頸，主勝值得再追。

（有線61台周五凌晨2時直播）
首回合戰果：熱刺1:3賓菲加