熱刺鬧中堅荒照喪攻 賓菲加搏命做大騷

猪拉多纳

歐霸盃16強今晚戰火重燃，力求收復落後1:3失地嘅熱刺，會喺今晚次回合造訪賓菲加，進行絕地反擊戰。講就容易，熱刺家陣鬧緊中堅荒，今晚如果連卡保奧都落唔到場嘅話，領隊舒活隨時連一個正規中堅都冇，作客同賓菲加鬥攻隨時入埋唔夠輸，吼1.77倍大等睇入球騷最明智。

（有線61周五凌晨2:00直播）
熱刺卡保奧有傷上陣成疑

首回合賓菲加憑安達臣雷沙奧梅開二度，加上洛迪高摩連奴入波，作客大破熱刺3:1，坦白講呢支葡超「一哥」幾乎入硬8強咁滯。不過熱刺就冇自暴自棄，翼鋒安祖斯唐辛賽前話佢哋冇嘢好輸，今仗去到賓菲加地頭會豁出去喪攻，預計領隊舒活會派遣艾迪巴約同蘇爾達杜合組雙箭頭掛帥。

前面有睇頭，後面就濕滯咯！據英國《每日星報》透露，法國中堅卡保奧喺上仗「北倫敦打吡」受傷，今仗未必落場，加埋維頓漢要坐波監，基利捷斯同隊長戴臣亦養緊傷，如果卡保奧真係唔掂嘅話，熱刺今仗就連一個正規中堅都冇，即係話舒活除咗要搵防中辛度雲尼亞里客串之外，仲可能要諗計填埋另一個中堅位置。
賓菲加晉級在望照強陣

熱刺本死嚟攻，賓菲加亦一樣，主帥佐治捷西斯前晚向《球報》表示，好想知道球隊係咪有「爭冠DNA」，所以就算總比數領先緊3:1都唔會Hea踢，照舊會派強陣出擊贏到盡。佢哋上場聯賽以4:2大勝國民隊，一對主力射手拿沙馬高域及洛迪高摩連奴都踢唔足全場，就連奧斯卡卡度素都休戰，擺明想再落多次熱刺面喎！既然賓菲加首回合去到白鹿徑都省3粒，今鋪返到自己地頭隨時攻得仲癲，撞正有前冇後兼且唔慌踢得保守嘅熱刺，入波邊會少吖！
Data King：賓菲加主場10連勝

‧自2012年10月歐聯分組賽輸畀巴塞後，賓菲加打後10場歐戰主場錄9勝1和不敗。

‧熱刺歷來喺歐戰淘汰階段，從未試過首回合主場輸波後能夠晉級。

‧賓菲加近10場主場賽事全勝。
乜都玩錦囊：賓菲加主W趁熱食

賓菲加今季戰績起飛，主場出擊橫行無忌係最大因素，今季所有19場主場賽事就錄15勝4和佳績，既然首回合作客都贏到熱刺，今鋪返主場要再下一城唔難，1.56倍主W趁熱食。
首回合︰賓客勝3:1