紅魔「讓和」扑「錘」朗尼專恰韋斯咸

猪拉多纳

曼聯啱啱响歐聯16強次回合主場以3:0大炒奧林比亞高斯，兩回合計以3:2僅勝對手，驚險晉級8強，賽後莫耶斯仲話有信心可以帶領「紅魔」奪冠。依家曼聯成班球員士氣返晒嚟，今晚重返英超戰線造訪韋斯咸，雖然「錘仔幫」已經主場3連勝，但Yennie相信「錘仔剋星」朗尼可以帶領「紅魔」乘勝追擊，小勝韋斯咸，客隊讓一球，一於敲分頭十足嘅3.4倍「讓球和」！

唔少「紅魔躉」今季都好心淡，但隨住曼聯周中喺歐聯憑尹佩斯大演帽子戲法，兩回合計以3:2淘汰奧林比亞高斯殺入8強，相信唔單止球迷，就連「紅魔」戰將嘅信心都返晒嚟！呢場波尹佩斯整傷咗膝頭退下火線，今晚會唔會落場仲係未知數，不過Yennie就一啲都唔擔心，事關朗尼專恰韋斯咸，「魔童」近7次英超上陣鬥「錘仔幫」足足貢獻咗7個入波同3次助攻，今晚要撕破韋斯咸大門絕對唔難！
「錘仔幫」跌晒Watt射門命中率最差

韋斯咸上個月連贏史雲斯、阿士東維拉、諾域治同修咸頓，領隊艾拿戴斯亦榮膺2月份英超最佳領隊，「大Sam」賽前話只要拎多7分就有信心護級成功，但小妹就認為佢哋今仗好難搶分喇！畢竟韋斯咸近9次聯賽鬥曼聯有6場入唔到波，至攞命係佢哋「榮膺」英超射門命中率最差嗰隊，今季場均得3.2次射門中框，對住連續3場英超作客保持清白身嘅曼聯，未必搵到着數。

踏入3月，韋斯咸就連續輸畀愛華頓同史篤城，走勢明顯跌晒Watt，今仗遇上回勇嘅「紅魔」似乎難逃一敗，考慮到「錘仔幫」主場3連勝，喺自己地頭出擊應該唔會太失禮，預計今晚就算輸都唔會輸得太肉酸，Yennie估曼聯今晚小勝啱數。