坐騎質量並重安國倫博得過

猪拉多纳

　　韋達由今期起停賽兩日，唔通又到潘頓與雷神單挑之局？兩人今日都騎足11場，聲勢浩大，手上咁多籌碼，一人殺三兩場好正常，加埋可能包辦到全日一半頭馬以上。

　　睇過佢哋兩個啲坐騎，唔係冇咁嘅可能，潘頓手執幾件好嘢，例如「一哥」、「準備就緒」、「誰可拼」，雷神亦都唔輸蝕，有幾匹新血「誇惑」、「赤壁武士」、「創意寶」撐場，淨係呢6匹馬，肯定有一半以上會係今日大熱門，咁多牌面馬，仲唔係一場大廝殺？！

　　之不過，今季唔係冇出現過類似情景，雖然潘莫二人唔係未試過交到貨，為熱門客帶來連場勝利，但好多時跑出嘅係安國倫、田泰安，甚至乎巫斯義，真係希望愈大，失望愈大。

　　部分馬賠率唔錯

　　問心嗰句，今期安國倫啲馬真係唔錯，數量與質量一定唔差得過潘莫二人。較早場次有「愛蓮說」、「秋月春風」及「招財快駒」，下半場有「喜樂洋洋」、「銳不可擋」、「強中堅」及「坪踪㨗影」，有實力之餘，部分仲會有唔錯賠率，點會博唔過。(Jack)