修咸頓+1搶住食

猪拉多纳

熱刺搏殘又入錯貨

英超老牌球會熱刺剛於歐霸盃悲情出局，話咁快就要喺聯賽主場硬撼修咸頓，佢哋連搏四場殘晒，現時傷兵問題嚴重，將士生理同心理都唔係處於最佳狀態。「聖人」出名逼搶夠勁，今場用壓迫踢法可保不敗，讓球客勝有1.65倍捧得過！

（now 621周日晚9時30分直播）

熱刺季前花費過億增兵取代王牌球星加里夫巴利，經過大半季後，依家淨係得基斯甸艾歷臣同荷西保連奴較為對辦，查迪尼直到上場歐霸盃先踢出身價入兩粒，但拉勻計都係水貨較多，其中射手蘇爾達杜淨係識入十二碼，而拉美拿同伊天卡普爾都冇料到，依家仲要傷晒，真係完全唔掂！

熱刺去到季尾賽程密密麻麻，近期於歐霸盃兩鬥賓菲加，最終都係飲恨出局，中間仲要喺聯賽連撼倫敦大敵阿仙奴同車路士，搞到班兵搏到傷晒。大軍防線成重災區，中堅戴臣同基利捷斯都唔踢得，今場卡保奧及維頓漢料會帶傷復出扼守中路，右閘基爾獲加亦有傷，成班波狀態不足隨時出事。
「聖人」擅逼搶反客為主

修咸頓組軍方針同熱刺完全唔同，隊內好多球員都係來自球會青訓系統，左閘勞基梳爾更成為英超列強爭奪對象。佢哋今季成績平平穩穩，最令人印象深刻係中場逼搶效率甚高，今戰雖有中場積克確克及雲耶馬養傷，但影響唔算好大，趁熱刺疲兵再戰，可用體力優勢逼死對手，隨時反客為主。
領隊Chit Chat

舒活(熱刺)：球隊上場對住賓菲加踢得好好，班球員喺陣上真係好搏命，若然佢哋可以保持水準，相信其他對手都會怕咗熱刺！

普捷天奴(修咸頓)：有關個人去留問題唔會令我哋分心，球隊會如常盡力爭取最佳成績，若然爭到歐霸盃席位係好事，我哋一定會盡力！