施多夫冇料 AC難「素」黑氣

猪拉多纳

AC米蘭換咗施多夫做教練，成績都係冇咩起色，最近慘吞4連敗，認真唔多掂。施多夫搞到一鑊粥，有傳AC高層已經話只會畀多兩場機會佢。雖然「紅黑兵團」球星如雲，但係踢成咁就知施帥功力麻麻，今輪喺意甲作客拉素，一於棒打落水狗，撐2.3倍主勝！

（TVB301周一凌晨3:45直播）
拉素主場對賽佔優

AC今季季中換帥，施多夫臨危受命。第一場頭威頭勢贏咗維羅納，但之後表現無以為繼；計埋歐聯，施帥領軍成績只係4勝1和7負，最近4場全敗。意大利傳媒爆料，話AC高層已經忍無可忍，只會畀多兩場機會施多夫，如果佢喺今輪對拉素同下場對費倫天拿都交唔到貨，就等收大信封，你話施多夫愁唔愁爆先。雖然艾沙拉維今季長抖係有影響，但係球隊仲有卡卡、巴洛迪利呢啲猛人，都踢唔到好成績，就知問題係施帥而唔係邊個。

佢哋今場仲有中場大腦蒙杜利禾受傷唔踢得，門將艾比亞迪坐波監，要由艾米利亞把關。拉素雖然都唔齊腳，但係好在冇咁多傷停，而且近3次主場對AC有2勝1和嘅戰績撐住，呢個時候梗係捧拉素啦！