艾美利亞不設防 皇蘇等開餐

猪拉多纳

今晚西甲獨腳戲，艾美利亞主場迎戰皇家蘇斯達。現時深陷降班漩渦嘅艾美利亞，球員表現直插谷底，今場更有首席射手洛迪里奧斯停賽，對住有卡路士韋拿同基沙文孭飛數胡嘅皇蘇，隨時聽做炮灰，首選1.93倍客勝夠穩陣，進取嘅不妨直插3.8倍「讓客」。

（開賽時間：周二清晨5:00）

艾美利亞喺3月戰績低迷，踢3場聯賽輸足3場，輸畀巴塞隆拿同西維爾兩支前列分子都話情有可原吖，弊在上輪鬥同屬下游嘅華歷簡奴都不堪一擊，成班後衞更化身「黃大仙」，3場波夾埋勁失10球。
3場夾埋失10球

開講有話屋漏偏逢連夜雨，防線穿窿嘅艾美利亞，今場除咗有中堅杜斯基利右腳大腿受傷，未必能夠落場搏殺，首席射手洛迪里奧斯亦儲夠黃牌要坐波監，進攻防守核心齊齊缺陣咁大煲，好難捧得落手啫。

另邊廂，皇蘇雖有左閘荷西安祖停賽，但迪拉比拿能夠勝任相同位置，面對進攻火力激減嘅艾美利亞，足夠抵擋對手進襲。再者，基沙文、阿基列斯同卡路士韋拿幾名進攻好手，今場全部候命落場搏殺，面對艾美利亞嗰條紙紮防線，客勝可以話坐定粒六，殺得性起嘅話，隨時開埋「讓客」都唔奇。