紐卡素五勞七傷啃唔落拖肥

猪拉多纳

愛華頓已經有4場作客連敗紀錄，不過認真睇一睇，對手全數都係前列球隊，實力確係比「拖肥糖」高一班。今輪佢哋作客紐卡素，對手有幾名正選受傷患困擾上唔到陣，愛華頓有機會可以終止呢個作客連敗頹勢。愛華頓讓平半，一於撐1.86倍嘅上盤。

（now623台周三凌晨3:45直播）
愛華頓要終止客戰頹勢

其實愛華頓喺2014年狀態唔錯，主場贏到開巷，但作客即時腳軟，到目為止只係贏一場咁大把，最近仲要連輸4場！過去4場作客對手確係難打，阿仙奴、車路士、利物浦都係主場特別強嘅球隊，「拖肥糖」真係冇得鬥。而2月初佢哋以0:1不敵熱刺場波，其實雙方都有番咁上下，只係愛軍埋門欠佳，所以輸波收場。今場佢哋都幾齊腳，得中場派拿膝傷長抖，今仗無緣上陣，隊長菲臘積基爾卡亦差唔多傷愈，今場有機會復出。

至於「喜鵲」呢排受傷兵潮影響表現反覆，射手雷米、後防迪保治兩大主力今場仲未出得，大衞辛頓傷患亦未好得晒，今仗上陣成疑。「拖肥糖」今場對住紐卡素，仲唔做「打鵲英雄」？呢個上盤梗係要撐啦！