獅吼輪換歎細界

猪拉多纳

例行公事搏嚟無謂

今日澳職上演布里斯班獅吼主場對墨爾本雄心，獅吼上仗贏波後，提早奪得常規賽冠軍，餘下三輪賽事成為例行公事，應會有保留，以免造成傷兵問題，影響季後賽爭標，球員難免會錫身hea踢。雄心連接失分後，進身季後賽機會愈來愈渺茫，球員或萌生等收鑼心態唔慌會搏。今仗雙方鬥心不足，勝負難料，Mic少寧揀入球細。

（有線64及203台周五下午5時直播）

獅吼上輪補時入波，1比0擊敗爭標對手墨爾本勝利，拋離次席西悉尼流浪者10分，以超班姿態衝線。亦都因為錦標剛落袋，球員可以暫時鬆一鬆，細味捧盃喜悅，今仗應會抱輕鬆心情應戰。其實奪取常規賽冠軍只係第一步，獅吼將放眼季後賽，力爭捧埋總冠軍，預料教練梅維爾餘下三輪賽事，會輪流畀主力休息，留力季後賽再搏過。獅吼其他球員即使上陣，亦肯定會留有一手，否則喺例行公事受傷，搞到冇得踢季後賽，咁就喊都無謂。
雄心洩氣等收咧

墨爾本雄心一月被曼城收購後曾經大爆發，打出一段六勝一和佳績，但球隊始終礙於質素有限，近期已打回原形，加上已落後第六位紐卡素噴射機七分，打入季後賽機會稱得上名存實亡。球隊已將希望放喺下季，因為曼城屆時或會借出球員畀雄心，幫助佢哋捲土重來，依家都無謂再搏，一於要細盤。