紅魔攞氣勢誓擦私房菜

猪拉多纳

曼聯成績同主帥莫耶斯民望一樣低處未算低，隨住上場打吡戰畀死敵曼城大炒後，反莫陣營會行動升級，今晚主場對阿士東維拉將以飛機吊起橫額要求莫耶斯下台。「紅魔鬼」歐聯決戰拜仁前唔想失威，對住私房菜維拉必求大勝，博2.08倍讓球主勝！
魔粉賽前落莫帥面

「紅魔鬼」上仗主場對曼城淨吞三蛋，反莫「魔粉」忍無可忍，佢哋籌集840鎊(約10,800港元)租用小型飛機，今場開波前10分鐘會於奧脫福上空吊住寫上「Wrong One - Moyes Out」（錯的人，莫耶斯下台）嘅橫額，擺明要落莫帥面。消息指曼聯管理層亦不滿傳奇教頭費格遜欽點莫耶斯嚟攪亂檔，直頭燒埋費Sir嗰疊，真係多得莫耶斯唔少！

曼聯中堅莊尼伊雲斯、基斯史摩寧、尼曼查維迪及射手尹佩斯全部有傷，料會齊齊休戰。「紅魔鬼」嚟緊周中會於歐聯挑戰德甲巨人拜仁，佢哋實力唔及對手，更加希望喺今戰打起個勢，否則真係凶多吉少。曼聯於英超史上21次主場對維拉贏16場，近6次碰頭不分主客錄得全勝，其中4場贏兩球或以上，完全恰死對手，心理上必佔優。
維拉態沉往績輸晒

維拉教頭林拔賽前就話非常同情莫耶斯嘅遭遇，仲認為莫帥已經盡力，正如佢自己都好落力幫緊維拉喎。隊內主將艾亞馬迪同安祖斯韋文有傷上陣成疑，上輪主場鬥史篤城大敗輸得太難睇，加上往績處下風，今戰隨時畀人大炒。
now 621周六晚8時45分直播