曼城高人踩冧兵工廠

猪拉多纳

Yaya 迪斯高6呎大杉弗到漏

今晚英超尾場重頭戲，由阿仙奴主場硬撼曼城！「藍月亮」呢輪強勢沒法擋，比起「兵工廠」明顯「高」人一等，兩把「6呎尖刀」耶耶托尼同迪斯高近3場包辦6球，對住防線唔掂嘅阿仙奴肯定「捅多兩刀」，把握機會搶分追「車」，曼城作客小讓平半，梗係捧1.77倍上盤。

（now621台周日凌晨1:30直播）

車路士同利物浦分列聯賽榜第1、2位，但查實最有優勢嗰隊係曼城，呢支「3哥」目前落後「藍戰士」3分但就踢少兩場，況且足總盃同歐聯兩項賽事都已經Game Over，家陣可以集中火力喺聯賽搶分，撞正邊隊都肯定殺無赦。佢哋最近3場英超贏晒喪入10球，雖然話阿古路仲養緊傷，不過迪斯高同耶耶托尼弗成咁，冇「阿Kun」都No Problem。
沙格拿或入「城」阿仙奴士氣曳

矮仔重心低，但高佬都一樣咁穩陣，你睇「Yaya」成6呎3吋高，腳下功夫不知幾好，呢位應屆非洲足球先生盤、射、扭瓣瓣掂，今季17個聯賽入球當中，更加有4球「士哥」係嚟自罰球，加埋6呎4吋高嘅迪斯高唔單止頂得、撞得，刁轉射門先係佢嘅強項，上仗喺「曼市打吡」梅開二度嘅第2粒，就充分表現出佢嘅射門能力。

曼城行運一條龍，反觀阿仙奴就跌緊Watt，前仗喺「倫敦打吡」狂吞車路士6蛋，周中亦因為一個烏龍波畀史雲斯逼和2:2，依家莫講話爭標機會渺茫，隨時連前4都未必保得住。狀態已經唔掂，最弊係季尾約滿嘅沙格拿，前晚獲今仗對手曼城開出3年合約力邀今夏過檔，據講呢位法國右閘已考慮緊離「廠」，又留唔住球星，阿仙奴陣營士氣唔差就有鬼咯！「兵工廠」除咗有韋舒亞、艾朗藍斯同奧斯爾等傷兵，門將施捷斯尼亦因傷未必落場，陣容比起首循環輸畀曼城3:6場波更殘，今鋪佔地利都唔慌有運行。
Data King：藍月亮旺開半場細

‧曼城連續5場英超零失球。

‧阿仙奴近5次主場鬥曼城僅入1球。

‧曼城連開8口半場細。