醉必勝傲視同群

猪拉多纳

　　執筆之時，天色陰暗，仲有幾陣大雨，睇埋天氣預測，今日好大可能在雨中作賽，唉，跑馬先落雨，真係天公不造美。不過，咁有咁好，起碼阿棟會同自己講，睇定先好買，亦要更有節制，無謂明知賽果可能亂籠，仲要「樁」個頭埋去。

　　第三場本地三級賽1800米。「醉必勝」上次喺金盃遇到「軍事出擊」，唔夠跑好正常，實力唔係嗰個層面，根本冇可能偷雞。

　　此駒今次由2000米轉戰此程，又由一級變成三級賽，兩項轉變對隻馬嚟講都係好事，假假哋前仗百年紀念瓶，只係輸少少畀依家喺杜拜嘅「事事為王」，呢場負磅一樣係輕飄飄，睇埋隔晚熱得好緊要，真係似層層。

　　第五場四班2000米。「海洋活力」陣上用咩跑法，係決定隻馬機會最主要因素，依家阿輝唔會唔知，尤其經過上一場成功示範，更加令到佢會繼續畀前領嘅策騎指示，對維持匹馬嘅表現，起到好大作用。

　　另外，呢匹馬好韌，跑長二百米唔會腳仔軟，氣量唔使擔心，話唔埋比起跑1800米更加有威力，係時候打開勝門。

　　陽明星星復仇有望

　　第八場三班1600米。「陽明星星」前一場除晒啲配備，即刻順利勝出，上次再跑只係輸少少，米高鄭對症下藥，隻馬真正實力終於重見天日。

　　雖然，呢次「陽明星星」再次碰上「雄心巨龍」，因為兩駒排檔唔同咗，呢次形勢剛好與上一場互易，而韋達排內檔向來演出穩陣，有望報回一箭之仇。

　　陳華棟 資深評馬人