基達菲16場不勝華倫乘機踩多腳

猪拉多纳

華倫西亞今晚西甲主場迎戰基達菲，主隊周中作客艾美利亞領先兩球之下被逼和，眾將谷埋一肚氣，今晚主場出擊一定唔會手軟。華倫下半季交足功課，反觀基達菲成績大倒退，啱啱主場輸埋畀維拉利爾後已累積16場不勝，今晚無理由唔捧華倫「讓主」啫！

（開賽時間：周一凌晨3:00）

華倫季中換咗教練，正選班底亦換咗半隊，以為惡唔出樣，點知下半季戰績不跌反升，代表作點可以唔數作客魯營球場擊敗巴塞隆拿。曾効力巴塞嘅老將施度基達經驗豐富，喺中場攻守平衡發揮出極大作用，上仗更取得加盟後首個入球。另外，下半季獲得重用嘅前鋒柏高艾卡沙勤於跑動，配合好波之人莊拿斯干卡維斯，產生到一定化學作用，自然令華倫前線交到功課啦。
基達菲攻擊力薄弱

基達菲下半季演出走晒樣，喺聯賽榜跌吓跌吓跌到落尾三，已經累積16場不勝，明顯出現信心危機，士氣極差。球隊近16場比賽之中只有4場可以攻破對手大門，可想而知攻力有幾差。今晚作客下半季鋒力十足嘅華倫，不勝紀錄大有機會增至17場。