諾在其中:競駿精英穩如鐵塔

不死鸟

 梁家俊周三因哮喘病復發缺陣，點知今日仲未能夠披甲，雖然八匹坐騎中唔少係實力分子，但小妹最擔心嘅唔係佢損失咗幾多獎金，反而係佢嘅健康狀況。小妹細個亦患有哮喘，所以好明白呢個病有幾辛苦，嗰陣醫生同我講，如果喺發育期完成前冇再復發，咁先叫完全好番，否則呢個病有可能跟足一世﹔好彩十二歲後冇再病發，咁先至平平安安咁長大，希望梁家俊可以快啲康復喇﹗

　　心水場次係第七場三班千六米，「競駿精英」季內七仗全入前四名，表現極之忠心，上場同程末段追勢凌厲，終點前以頸位壓倒「家家寶」同「家家興旺」贏馬，後兩駒再出即贏，賽績咁勁，相信「競駿精英」喺三班全冇阻力，就算負重磅都唔驚，穩膽。

　　「駿馬精英」上仗同程排八檔，出閘後走三叠冇遮擋大敗，搞到冼毅力賽後要解釋騎法，但前仗同程力鬥「家家寶」，最終雖輸頭位跑第二，亦已證明居三班夠晒惡氣，呢場回配主帥白德民，配腳首選。「中國陸家」今季跑得少，體力應稍佔優勢，重配普萊西要拖。「賞惑」至今六戰得兩冠一亞一季，上仗後追一段走勢吸引，續有進步嘅質新三歲馬，宜兼顧。

至勇飛龍增程更合

　　另一場心水係第十場三班千四米，小妹推介「至勇飛龍」做膽。呢匹馬上仗插班初出，即喺田草千二米輸四分三馬位跑第二，證明質素唔簡單，今次轉跑千四米更合追趕，有力開齋。配腳優先留意「太陽能」，上仗同程嘅梁家俊胯下跑第四，輸兩個半馬位已有交代，強配柏寶要防。「文武精英」前仗喺三班同程輕勝兩個幾馬位，姿態輕鬆，排一檔有利留放，當然要拖。「貝利高」季內七戰非勝即位，咁忠心要吼實。