馬體會頂到半場和

猪拉多纳

瘋搶戰術制到「地上最強」

今晚歐聯8強首回合爆發西班牙內訌，由技術流巴塞隆拿主場惡鬥力量型馬德里體育會。「床單兵團」馬體會自血性教頭施蒙尼改造後，個個變晒Man爆拳手，打出屬於自己嘅瘋狂逼搶風格，強如一向搓到人傻嘅巴塞，今季3度交鋒未贏過之餘，場場都跌入其節奏被迫跟住走，證明一山還有一山高，預計「床單兵團」嘅瘋搶戰術，會令場波處於膠着狀態，斯維建議捧半場和。

（有線62及202台周三凌晨2時45分直播）

早喺球員時代，出任防中嘅施蒙尼就以勇悍見稱，轉做教練後，佢亦將呢種血性注入球隊，因此無論係兇神惡煞嘅迪亞高哥斯達、基比、馬里奧蘇亞雷斯、阿達杜倫、祖奧米蘭達，定係技術細膩嘅迪亞高、荷西蘇沙、佐治高基等，個個都畀施帥操到好似拳手咁體能超勁，兼衝得搶得滿場飛，先可貫徹其全場壓迫嘅風格，一失波就地反搶，每人都肩負防守任務，呢種正係屬於「床單兵團」嘅比賽節奏，務求打亂對方嘅進攻組織，並跌入自己嘅節奏，牢牢掌控比賽嘅主導權。
老門神賓度係「計時炸彈」

馬體會箭頭迪亞高哥斯達就係最佳人辦，佢喺前線橫衝直撞不斷奔跑，令對手未能喺後場從容地搓上去及被迫用長傳，配合基比及馬里奧蘇亞雷斯等中場「悍匪」，好容易便搶番控球權。與「床單兵團」南轅北轍，巴塞絕對技術流嘅一代宗師，美斯、沙維、恩尼斯達雖然細細粒，但靠不斷傳波便搓散對方，進攻組織水銀瀉地，境界之高獨步天下。可惜指揮官沙維已經34歲，體能及水準明顯下滑，美斯今季又頻頻受傷，就算主帥馬天奴加多個法比加斯增強控球能力，但同巔峰時期仍有距離。最重要係巴塞對住一啲防守硬淨、極度體力化兼紀律嚴明嘅球隊，總係非常蝕底，當年車路士就打到佢哋一戙都冇，如今嘅馬體會與車仔可謂如出一轍。

今季雙方先後喺西超盃兩回合及聯賽首循環碰頭，結果全部打和，馬體會正係靠全場瘋搶嘅打法，完全打亂巴塞嘅進攻節奏，後者甚至略處下風，證明呢招治到「地上最強」，並令馬體會眾將信心爆棚。況且巴塞有正選門神域陀華迪斯重創長抖，焗住要用後備門將賓度把關，呢位38歲西班牙老將久疏戰陣，勢必成為防線嘅計時炸彈。始終今仗只係首回合，面對「床單兵團」一班筋肉人，相信巴塞主帥馬天奴希望穩穩陣陣，睇定先食，隨時令比賽初段進入膠着狀態，加上巴塞16強兩鬥曼城均開半場和，不妨追多鋪。