PSG試車博半場和

猪拉多纳

莫連奴到訪巴黎擺「鐵桶陣」

今晚歐聯8強首回合上演「首都大戰」，巴黎聖日耳門（PSG）主場迎戰倫敦車路士，PSG喺卡塔爾財團大水喉支持下，處於最好時代，已雄霸法甲，劍指歐洲盟主寶座，單純人腳質素秤，呢支新土豪力足問鼎冠軍。不過，踢波始終屬團體運動，經驗、戰術等因素亦好重要。呢幾方面，車仔絕對唔輸蝕，主帥莫連奴「筋肉鐵桶陣」痛擊豪強輝煌戰績，夠令對手退避三舍，相信主隊教練白蘭斯唔敢放肆。高手過招先靜而後謀動，估計雙方上半場以試探為主，換邊後再廝殺，推介2倍半場和。

（有線61及64台周四凌晨2時45分直播）

PSG上屆8強僅因作客入球較少，被巴塞淘汰，但已贏盡口碑，今季簽下卡雲尼、馬昆奴斯哥利亞之後，攻守級數進一步提升，上圈作客炒利華古遜4蛋，霸氣十足，難怪今仗鬥「車」要讓波。的而且確，PSG多方面佔有優勢，首先佢哋聯賽已拋棄對手，可投放更多力量踢歐聯，其次球隊三線實力平均，鋒線孖寶伊巴謙莫域、卡雲尼有幾犀利毋須多講，中場馬度迪、馬高華拉堤剛柔並濟，一對巴西中堅堤亞高施華及馬昆奴斯哥利亞同聲同氣，默契十足。

不過，PSG亦有弱點，致命傷係歐聯經驗遠不如車仔，尤其係教練白蘭斯面對有兩個歐聯冠軍獎牌嘅莫連奴，更顯得寒酸。「神級」對手當前，即使白蘭斯手上擁有多位攻擊好手，估計佢都唔敢谷得太前，否則畀車仔突擊反咬一啖，獲得作客入球，就會相當難踢。因此預料PSG上半場唔會急於搶攻。
車仔歐聯常客識留放

莫連奴過往打巴塞等豪門，最拿手用「筋肉鐵桶陣」，排出三防中陣式，以硬朗攔截逼搶，令對手難以組織攻擊。車仔英超戰線壓力沉重，近況處於下風，好難奢望佢哋可以喺巴黎奏捷，有理由相信莫帥又會大踢「破壞性足球」，以拉美利斯、大衞雷斯、約翰米基爾喺中場線來堵塞PSG來犯，希望全身而退。

其實車仔首回合作客唔輸已經有着數，上半場屬關鍵所在，必須站穩陣腳，等對手銳氣逐漸下降，再謀突擊。莫連奴咁精明，自然識避重就輕，等下半場再埋牙，所以半場和真係好值得捧場。
大戰Chit Chat

白蘭斯(巴黎聖日耳門)：我喺英超比賽過，好記得佢哋速度快、對抗性強，絕對係難以應付嘅對手，我哋要盡量保持控球在腳，把握每次攻門機會。

莫連奴(車路士)：巴黎係一個好地方，球場靚、對手強，但我哋都係由最佳球員組成，一樣非常強大，贏波從來唔係咩問題。
歐聯密碼

01:莫連奴身為車路士主帥嘅第1場歐洲賽事就係作客PSG，當時係2004年車仔贏3:0

11:伊度奧今季嘅11個入球全部都喺主場入

28SG喺主場已經連續28場歐洲賽不敗

41SG前鋒伊巴謙莫域為球會及國家總共上陣36次，共入41球

135:PSG中堅阿歷斯洛里高曾喺07-12年期間為車路士上陣135次