皇馬報仇入波必多

猪拉多纳

C朗歐聯百戰要攞威

歐聯8強首回合上演復仇大戰，西甲皇家馬德里主場迎戰德甲多蒙特，皇馬上屆喺準決賽兩回合合計以3比4遭多蒙特淘汰出局，今晚主場當然要趁對手多名主力缺陣有仇報仇。何況今場係C朗個人嘅第100場歐聯賽事，以呢位咁重視個人榮譽嘅皇馬巨星性格，當然要盡情入波以作紀念，面對同樣喜攻惡守嘅多蒙特，注定係入球騷，入球大細中位數調整到3.5球都不成問題，黑柴撐2.05倍大盤。

（有線62台周四凌晨2時45分直播）

C朗喺上圈次回合對史浩克04，唔理首回合領先緊6比1，亦唔理跟住有西班牙「國家打吡」對巴塞隆拿，堅持搏足全場進帳兩球，足見佢對歐聯入波趨之若鶩。事實上，今場除咗係歐聯百戰外，C朗當然亦要繼續衝擊歐聯入球紀錄，呢位過去99場歐聯賽事共入63球嘅頂級射手，單喺今屆8場賽事已入咗13球，只差一球就可以追平意大利名宿艾達芬尼同美斯兩人共享嘅一季入14球紀錄，C朗近期腳風真係超順，自二月底主場對史浩克04起計，佢已經連續8場有波入，注定成為今晚巴拿貝嘅頭號男主角。
多蒙特殘陣都唔會守

除咗C朗，皇馬今屆歐聯亦同樣瘋狂，佢哋喺8場賽事已合共轟入29球，包括上圈兩回合合計大炒史浩克9比2，不過皇馬防線喺歐聯賽事亦唔見穩陣，除咗兩對弱旅哥本哈根冇失波外，今屆面對加拉塔沙雷、祖雲達斯同史浩克，無論主客場都要失波，喺今屆8場歐聯比賽，有6場總入球達到3.5球以上，踢法認真開放。皇馬今場有艾比路亞、馬些路、基迪拉同謝斯洛迪古斯因傷缺陣，另一中場莫迪歷亦有傷上陣成疑，防中隨時會用到小將伊拿拉文迪，對防線保護能力難免削弱。

多蒙特係上屆歐聯亞軍，但今季長期受傷兵問題困擾，今仗續有蘇保迪、舒姆沙、根度簡、施雲賓達同巴拉斯塞高斯基因傷缺陣，箭頭羅拔利雲度夫斯基又要停賽，戰鬥力下滑，作客巴拿貝形勢相當下風。不過教頭高普向來喜歡用奇兵，就算作客都唔會死守，上圈佢哋面對辛尼特，兩回合賽事入5球亦失4球，球隊喺啱啱嘅德甲亦喺兩球落後劣勢下反勝史特加3比2，王牌球星馬高列奧斯連中三元，氣勢甚盛，今晚作客唔會龜縮，一於同皇馬駁火。
大戰Chit Chat

安察洛堤：(皇家馬德里)

個個都睇高我哋，但唔好忘記多蒙特嘅反擊有幾犀利，我哋只要失咗控球權，就會好危險。

高普(多蒙特)：要對付現時嘅皇馬談何容易，係人都知作客巴拿貝嘅難度，但我相信球員唔會退縮。
歐聯密碼

01:多蒙特曾作客西班牙球隊11次，唯1勝仗係喺96-97年球季歐聯分組賽擊敗馬體會

02:皇馬喺主場同德國球隊對戰25次，只輸咗2場，而呢2次都係輸畀拜仁慕尼黑

04:皇馬主帥安察洛堤以球員及主帥身份總共攞過4次歐聯冠軍

33:皇馬連續33場歐聯賽事有入球

100:今場係C朗出戰歐聯賽事第100場