皇馬報仇打殘蜜蜂兵 C朗鋒神

猪拉多纳

今晚歐聯8強首回合焦點大戰，梗係上屆4強翻版，皇家馬德里主場鬥多蒙特啦！當時「蜜蜂兵」靠羅拔利雲度夫斯基連入4球淘汰「銀河艦隊」，不過今晚怕且冇呢支歌仔唱喇，皆因多蒙特有「羅拔仔」停賽之餘又傷兵纍纍，《轉會市場》網站亦統計皇馬正選11人身價高達2.32億歐元，遠勝多蒙特嘅1.71億歐元，小妹睇好有弗爆士哥王C朗孭飛嘅皇馬有力報仇，捧1.95倍「讓主」啦！（有線62、中央5台周四凌晨2:45直播）

多蒙特主帥高普賽前勁口硬，話隊波「唔差得過上年」，不過虛張聲勢又有咩用，無論士氣、實力定戰績，今季「蜜蜂仔」明顯唔及上年同期咁揪得，先有馬里奧葛斯畀拜仁撬走，「羅拔仔」又停賽，就算有速度極高嘅奧巴美揚頂替，但呢位射手身形、射術、制空力根本同「羅拔仔」冇得比，分分鐘搞到多蒙特擅長嘅突擊戰術發揮唔到。
羅拔仔停賽奧巴美揚冇得比

「蜜蜂兵」今季戰績下滑嘅最大原因，除咗米希達利恩等新兵未及時融入球隊外，就係傷兵問題異常嚴重，今仗有巴拉斯塞高斯基，兩大守將蘇保迪及舒姆沙休戰，加埋長抖嘅根度簡同施雲賓達，攻、守兵力都嚴重短缺，就算復出嘅馬高列奧斯上場大演帽子戲法，今仗對住皇馬都好難單天保至尊喇！
C朗連續8場入波

皇馬8強抽籤抽到多蒙特嗰陣，相信全隊得一個諗法：「報仇！」沙治奧拉莫斯更喺twitter鋪咗張去年同「羅拔仔」交鋒嘅相，暗示今仗唔會再放過多蒙特，就連今季先來投嘅加里夫巴利都講明會踢場好波報仇，戰意高昂，又邊係陣容天殘地缺嘅多蒙特可以比先？事實上皇馬今場除咗馬些路突然傷咗大髀，抖兩三個禮拜，前面好齊腳，近況大勇嘅C朗已連續8場取得士哥，加里夫巴利、賓施馬等射手近期亦鬼咁好火，今晚肯定轟散「蜜蜂兵」，等佢哋次回合冇仇報！
Data King：多蒙特11次征西得1勝

‧皇馬今季23場主場賽事除輸畀巴塞及馬體會外，其他21場全勝。

‧皇馬過去主場鬥德國球隊，紀錄係19勝4和2負。

‧多蒙特11次作客西班牙球隊，得1勝4和6負。
乜都玩錦囊：皇馬猛火3.5球照捧大

皇馬已經連續7場主場賽事取得至少3個入球，今場對住後防兵源短缺嘅多蒙特，相信亦唔會例外。不過「蜜蜂兵」有馬高列奧斯壓陣，火力亦唔講得笑，大敗之餘仍有望可以破蛋，就算今場入球中位數開到3.5球，2.05倍入球大仍然博得過。