賓菲加強打阿爾克馬爾

猪拉多纳

同晚另一場荷甲阿爾克馬爾主場鬥葡超班霸賓菲加屬強弱懸殊之爭，荷甲水準一向唔高，依家喺聯賽排第7嘅阿爾克馬爾能夠殺入8強其實已經算係超額完成，佢哋走到呢步全因運氣好，喺16強抽到支靚籤，對手只係沒落豪門安治，出線係應該，但今場對手係級數同安治爭好遠嘅賓菲加，阿軍想爆冷難度好高，所以今場熱捧1.65倍嘅客勝。

（有線63台周五凌晨3時05分直播）
洛迪高雙子星孭重飛

阿爾克馬爾喺16強兩回合計都係贏得安治1粒咁大把，安治係俄超魚腩，排喺聯賽榜尾，但阿軍都只係靠喺主場贏嘅1球出線，次回合攻極唔入打和0比0，可見阿軍實力喺歐洲賽場根本唔多夠班，今場難挑戰賓菲加。

賓菲加依家喺葡超穩站榜首，上一輪更係擊敗英超勁旅熱刺出線，級數同卡士簡直夠班打歐聯，而前鋒洛迪高利馬及洛迪高摩連奴呢對「洛迪高雙子星」繼續弗爆，上場聯賽作客贏布拉加嗰1球都係靠佢哋兩個合力炮製，今場雖然作客一樣未驚過，客W冇難度！