列斯聯拖糧難抗韋根

猪拉多纳

打工仔咁辛苦做嘢都係為咗搵餐晏仔，冇糧出就自然冇動力踢波，列斯聯班球員正正就係咁嘅情況，今晚英冠早場呢班頹兵會作客韋根，近7場輸足6場嘅列斯聯根本就冇勝算，2.15倍嘅讓球主勝都博得過！
英超賽會拒新財主收購

意大利財主施連奴有意收購列斯聯，但佢因涉及逃稅問題而不獲英超賽會通過收購，球員早前雖然同意喺3月份只收一半糧，但佢哋低落嘅士氣已經反映喺球場上，上個月輸咗5場咁多。日前同樣被拖糧嘅領隊麥達莫就公開表示球會已經出埋剩番嗰一半人工畀佢同班球員，但仍然無助於挽救士氣，球會仲未有人接手，3月解決咗人工又如何？4月又點算？列斯聯上一場喺主場都輸畀弱旅查爾頓，隊長羅斯麥哥馬克更炒埋12碼，呢隊波真係頹到貼地！

韋根雖然近三場不勝，但要注意當中有兩場係作客，韋根其實又係英冠另一隊地頭蟲，主場表現好過作客，上場主場對住榜首李斯特城爭啲勁到破埋對手不敗金身，真係唔嘢小，對住咁頹嘅列斯聯贏兩球或以上冇難度！
TVB 301 周六晚7時15分直播