曼城修咸頓吼半場大

猪拉多纳

追榜首起勢喪攻

贏波就可以追到落後榜首嘅利物浦1分，曼城今晚主場恭候修咸頓當然要起勢喪攻。適逢阿古路傷愈，迪斯高下場隨時冇碇企，今晚唔入波保住個正選點掂？撞啱對手「聖人」嘅「土炮三叉戟」拉爾拉拿、積洛迪古斯同列基林拔着晒火，相信呢場「大」龍鳳肯定做得成，進取啲捧2.05倍半場大。

（now621台周六晚7:45直播）
迪斯高Show Quali保正選位

家陣曼城雖然排第3，但就比1、2位嘅利物浦同車路士踢少兩場，爭標形勢佔盡主導，況且「藍月亮」上場失完分畀阿仙奴，今鋪對住修咸頓肯定有殺冇賠。阿古路話就話唔想急住復出，以免受傷無緣世界盃，但呢位阿根廷射手已經復操，今仗料會先任後備，迪斯高要繼續霸住正選席位嘅話，今場肯定會好好把握擔正機會，呢位波斯尼亞國腳近3次鬥修咸頓有兩球進帳，咁鍾意對「聖人」入波，話唔埋今晚又數胡。
「土炮三叉戟」近期着晒火

曼城今季英超主場14戰贏咗13場，近4年嚟亦未試過喺禮拜六主場輸波，不過修咸頓前鋒列基林拔就未驚過。呢位32歲嘅利物浦人尋日向《曼徹斯特晚報》表示，最想見到兒時愛隊「紅軍」捧走英超錦標，況且佢強調幫修咸頓力爭上游最緊要，加上自己都要搏表現取悅鶴臣入選英格蘭大軍出戰巴西世盃，林拔今鋪為公為私都肯定想射死曼城證明身價。

修咸頓上仗大炒紐卡素4蛋，「土炮三叉戟」林拔、積洛迪古斯同拉爾拉拿都有波入，「聖人」對上10場英超作客亦場場有「士哥」，要撕破有「炸彈」迪米捷利斯壓陣嘅曼城防線唔係天方夜譚。再睇埋往績，雙方近5次交手有4次開半場大，咁好路加埋兩軍都咁好火，冇理由唔追半場大啫！
乜都玩錦囊：修咸頓唔守撐曼城大勝

普捷天奴賽前話要搞喎曼城爭標夢，又話有信心可以喺「藍月亮」地頭攞晒3分，聽佢咁講，修咸頓今仗唔似會龜縮死守喎！曼城呢啲主攻型球隊最驚你唔攻啫，「聖人」唔識死，鬥攻隨時輸鑊勁，曼城1.8倍「讓主」要捧。
Data King：迪斯高鬥「聖人」例叫胡

‧曼城迪斯高近3次鬥修咸頓攻入2球。

‧曼城今季英超主場場均入球數字冠絕英超。

‧雙方近5次交手，4次開出半場大。