車仔攻城「大」反擊

猪拉多纳

客戰2連敗回歸主場唔衰得

先係踩蕉皮輸畀水晶宮，跟住就1:3不敵巴黎聖日耳門，客場兩連敗嘅車路士，喺英超同歐聯戰線都遭遇沉重打擊，慢吓手今季隨時四大皆空！不過Yennie就唔信「寸王」莫連奴會咁失威，今晚「藍戰士」返主場對史篤城肯定嚟個絕地大反彈，大踢進攻足球喪入波，今鋪一於坐定定睇入球騷，捧1.72倍入球大。
寸王大清洗 費托 巴亞搏晒命

英超榜首席位拱手讓咗畀利物浦，歐聯8強又暫時以1:3落後畀PSG，車路士連續兩鋪喺客場賴嘢，搞到莫連奴嬲到爆，喪插班後衞同前鋒冇料到，又話費蘭度托利斯一無是處。查實「寸王」早前都講過今年夏天會幫車路士大清洗，希望羅致一位世界級前鋒。「大佬」講到咁，相信費托同丹巴巴亞兩位「高危射手」如果有機會落場，肯定會做番齣好戲。
史篤城5戰4勝勁入10球

Yennie對車路士咁有信心，皆因佢哋今季16場英超主場未輸過，夾埋仲入咗39球，強如阿仙奴、利物浦、曼城同熱刺去到史丹福橋都要擺低3分，試問史篤城又點頂得住「藍戰士」嘅進襲吖？

不過咁，史篤城呢排Run得幾順，近5場聯賽有4場勝仗並攻入10球，當中奧丹維治仲連續3仗有士哥添。既然史篤城冇乜好爭，降班又輪唔到佢哋，冇乜心理包袱肯定踢得夠放，既然兩隊都咁入得，睇嚟入波唔會少。