高之格試準即拼

猪拉多纳

　　頭場五班1200米，全組贏過同程的戰馬只有四匹，當中「生生發」跌至15分乃其歷季新低；睇番此駒最近一次贏馬於上季同程，當時評33分，如今相距一季但評分卻已大幅下調，點計都有多少微利，而且今戰B+2跑道向來利放，這次排四檔僅負111磅輕飄飄正合本身跑法；此駒賽前兩度安排彈草閘砥礪，情況罕見，亦反映今戰大有盡地一煲之感，值得一吼。

　　「宇宙駿駒」至今跑了三季仍是處女馬，但同程演出卻算穩定，至今九戰獲三亞一季，上名率接近五成，今仗馬房更用王牌替牠報名，戰意鮮明可信。「逍遙駿將」落五班後已跑三仗，雖未上名但亦輸唔遠，其中上場竟可後追得第四，跑法更靈活，檔佳可爭一席。

　　第二場四班1000米，同班同程向來是初出馬天下，今場四匹同類分子中，應以告達理馬房的「高之格」最可取；牠已試過六課大閘夠多，走勢亦一次比一次好，做足準備擺明有心一出即勝。「駟馬難追」向來以谷草短途表現最好，但近兩次角逐田草直路賽的走勢不俗，其中上場跑第四僅以一個馬位不敵頭馬，繼續再跑此程必然有信心，應可提升名次佔取三甲一席。「龍城動力」目前評47分肯定減過龍，埋門試閘第二已見有起色，唔等下周贏馬路程泥地1200米及初跑直路賽，絕非無的放矢，不可不防。(耀鈞)