韋斯咸迎紅軍吼半場大

猪拉多纳

卡路爾撞2S 火花四

正所謂舊嘅唔去，新嘅唔嚟，利物浦前鋒蘇亞雷斯曾經同大舊中鋒安祖卡路爾合作過1個半球季，但呢對貴價「高矮配」並唔係想像中咁合拍，最終領隊羅渣士「棒打鴛鴦」，幫阿蘇搵嚟「史獨」史杜列治，兩個獨食精一拍即合，組成新「SAS」組合，今晚韋斯咸主場對利物浦，阿蘇會帶同「新歡」史杜列治「大晒恩愛」，向「舊愛」卡路爾大騷佢哋兩個有幾合拍，眼火爆嘅卡路爾隨時用頭槌頂爆紅軍防線「報復」，科娜一於捧半場大﹗

（now 621周日晚11時直播）
阿蘇史獨爭冠必搏命

阿蘇同卡路爾喺2011年1月尾齊齊以高價加盟利物浦，佢哋一個扭得一個頂得，備受期待，但事實證明佢哋好唔夾，踢極都冇默契，阿蘇技術細膩，卡路爾粗枝大葉，阿蘇嘅傳送往往令卡路爾難以捉摸，接應唔到佢啲波。最終呢對貌合神離組合喺主帥羅渣士上任後即刻散Band，唔適合地面進攻嘅卡路爾被掟走，羅帥就買入史杜列治同阿蘇組成全新前鋒組合。

當初好多利迷，包括科娜在內，都認為「史獨」+阿蘇呢Pair唔會合拍得去邊，兩個都係獨食精、都鍾意射波多過傳波，但結果係史獨第一日嚟到紅軍已經同阿蘇過晒電，佢哋自己搵到食之餘更會交畀對方入波，今季英超佢哋兩個已經合共入咗49球，平咗初代「SAS」組合舒利亞加瑟頓嘅整季入球數字，今場作客韋斯咸，預料又係「SAS」嘅天下，佢兩個今場目標唔單止係要入波增加個人紀錄，更係要用入球幫利物浦全取3分，保住爭標機會﹗

見到阿蘇帶「新歡」「踩場」，安祖卡路爾當然不是味兒，佢今場更要向「棒打鴛鴦」嘅羅渣士證明自己嘅實力，羅帥喺執教紅軍後即掟走佢，將佢借去韋斯咸，即使卡路爾喺「錘仔幫」嗰季表現唔差，羅帥仍然堅持喺去年夏天將佢賣走，正常人都會感到不忿，今場正係卡路爾報復嘅良機，佢上場對新特蘭已經向全世界證明佢嘅頭槌有幾「屈機」，依家狀態大勇，今場誓要頂爆出名頂頭槌唔掂嘅紅軍後防，半場大有望！