哈化「大」安旨意等放假

猪拉多纳

孖賀芬咸Hea踢亂攻

德甲今晚上演一場中游球隊對碰，哈化柏林主場鬥賀芬咸，驟眼望落好似冇乜睇頭咁，實情呢兩班波唔驚降班又無力爭入前列，「零壓力」鬥攻隨時仲好睇，呢場波幾大都要捧1.57倍「入球大」！

（有線61、64、201及203周日晚11:30直播）

哈化柏林上星期做咗拜仁慕尼黑捧盃嘅布景板，不過佢哋應該都唔會太介意，事關呢隊波自從歇冬後已經冇乜heart，鬼咩，降班唔輪到佢哋，想話力爭上游踢歐戰又近乎冇可能，乜嘢人生目標都冇晒，所以哈化近4場聯賽咪輸晒兼狂失11球囉！
賀芬咸近6戰入17粒失16球

作為哈化球迷，睇見呢個情況都可能會覺得難受，但作為投X人士，呢種踢波風格就相當好路喇，始終哈化即使連場敗北，但係個戰術一樣係攻攻攻，陣容更未見有重大調整，睇個款似乎係想Hea到放暑假，今場佢哋仲有防守中場施格斯停賽，冇埋第一道屏障，想唔失波都難。

賀芬咸近期做咗神經刀，可以主場慘敗畀緬恩斯，轉頭又可以作客逼和拜仁，估佢哋幾時變龍同幾時成蟲都幾惡搞，不過可以肯定嘅，係賀芬咸嘅比賽入波一定多，就睇近6場比賽吖，佢哋竟然入咗17粒，但同時又失番16球，以佢哋咁嘅踢法，「入球大」仲點會甩拖呀？
頂占筍盤：哈化柏林（入球大）