西維爾留力益晒愛斯賓奴

猪拉多纳

今晚西甲有場西維爾迎戰愛斯賓奴嘅前列大戰，主隊西維爾上周中喺歐霸盃8強首回合作客波圖以0:1落敗，雖然輸波而回，但戰果並唔算太差，始終西維爾實力唔曳，次回合絕對有機會反勝出線，既然佢哋個心已經去晒歐洲賽嗰度，板櫈深度又唔夠，今晚對愛斯賓奴好可能會派副選落場，咁嘅環境，都係撐愛斯賓奴個2.15倍「讓球客勝」着數啲。

（廣東體育周一凌晨1:00直播）
西維爾要兼顧歐霸盃

西維爾一向攻優於守，前鋒卡路士巴卡衝刺力強，配合隊長拿傑迪錫同好波之人加美路，鋒力係就係好勁，不過睇番個賽程，西維爾自3月10號開始，每3、4日就有一場比賽，最慘係佢哋兵源唔算充足，成班人踢到殘晒，嚟緊周中又要應付歐霸盃8強次回合賽事，若然要作出取捨，高不成低不就嘅西維爾，梗係寧願全力搏歐霸啦，今晚留力絕對可以理解。

愛斯賓奴近期嘅作客表現仲好過主場，近4次作客取得2勝1和1負，輸嗰場波亦只係輸畀榜首馬體會0:1，屬非戰之罪。愛斯賓奴鋒力唔算強橫，主要靠今季有11個聯賽入球嘅沙治奧加西亞喺前線搵食。不過，愛斯賓奴失波亦唔多，防守力係全西甲第5，證明有前西班牙國腳卡迪維拿壓陣嘅防線唔易失陷，就算今晚作客都有力保住不敗。