土炮博表現踢世盃水手復仇打殘天鵝

猪拉多纳

橫濱水手舊年爭奪日職冠軍失敗，除咗自己後勁不繼，其實真係多得新潟天鵝唔少，事關佢哋聯賽兩戰天鵝都吞蛋，失咗致命嘅6分，今日水手作客天鵝咬牙切齒話要報仇，平手盤不妨揀番水手個客勝。

（開賽時間：周日中午12:00）

水手舊年以1分之差畀廣島三箭騎過，爭取日職冠軍臨尾香，同主客兩鬥天鵝都輸波有直接關係，所以今場波被日媒形容係水手復仇之戰一啲都不為過。如果從近況嚟講，水手似乎及唔上聯賽、盃賽5戰不敗嘅天鵝，佢哋喺日職已經兩連敗，走勢唔多令人開胃。但係論到球員平均質素，水手明顯秤先天鵝些少，「日本美斯」齋藤學做完新郎哥兼養完傷，今日可以同中村俊輔並肩搏殺，又有伊藤翔喺前面竄擾，夠晒條件喺客場偷雞，就算另一位中場老大哥藤本淳吾未必出得都唔使驚。
天鵝齋靠3件主將數胡

天鵝雖然往績食住水手，不過呢隊波最大弱點在於靠晒幾件主將搵食，例如巴西中場硬漢里奧施華、新近入選日本國家隊集訓營嘅前鋒川又堅碁，以至盃賽入球機器鈴木武藏，目標非常大，只要水手針對性凍結咗呢幾個，天鵝就會變番「醜小鴨」——一支攻擊力好平凡嘅球隊。

由於仲有兩個月就係世界盃，好多日本國腳都要博表現，希望有份去巴西。齋藤學、川又堅碁自然會打甩髀，但係水手中堅中澤佑二呢件老坑，一樣未死心，佢講到明要搏命，畀沙哲朗尼睇到佢仲得，川又、鈴木呢對天鵝雙箭响佢面前未必有着數，平手盤坐和望贏嗰隊，應該係水手而唔係天鵝。