悉尼主勝擒鳳凰

猪拉多纳

夫添出擊爭入季後賽

澳職進入倒數最後兩輪，常規賽冠軍雖然早歸獅吼所有，不過季後賽資格依然爭崩頭。當中有份爭奪入場券嘅FC悉尼，主帥法連拿講明將聯賽當決賽咁打，迪比亞路亦話贏波志在必得，今輪喺主場迎戰虛火已過嘅威靈頓鳳凰，1.75倍主勝抵博。

（開賽時間：周日下午3:00）

FC悉尼喺「季後賽門券爭奪戰」稍為佔優，現時排第6位，最後兩輪分別主場鬥今場對手鳳凰同埋珀斯光輝，只要贏晒就確保攞到季後賽資格，爭勝心毋庸置疑。
鳳凰作客唔掂近3場失12球

悉尼教頭法連拿喺賽前落柯打，最後兩輪聯賽要當正決賽咁踢，而陣中球員亦傷疲盡起，今場能夠強陣應戰。至於迪比亞路就告誡隊友要打醒精神，避免失分令「爭奪戰」形勢變得被動。悉尼陣容完整、戰意鮮明，而且近9戰主場鬥鳳凰錄8勝1負嘅靚績支持，咁都唔捧主勝等幾時？

另邊廂，今季戰績低迷嘅鳳凰喺季中突然發威，砌低過中岸水手同西悉尼流浪者等前列分子，可惜佢哋後勁不繼，話咁快就回復「正常」，最近5場聯賽冇贏過不特止，其中3場作客夾埋仲勁失12球。

對於防線任人魚肉，鳳凰隊長兼中堅杜蘭迪承認難以接受，但今場唔使旨意會有咩改善，事關雲斯利亞同薛雲特呢對中後場主將有傷在身，未必能夠落場搏殺，勝任防守中場同兩閘嘅文尼梅斯卡特要停賽，更何況首、次席射手侯斯甘斯同堅尼根寧咸近3場顆粒無收，睇怕好難全身而退啦！