誓擒黑貓保歐戰夢 熱刺做「大」龍鳳

猪拉多纳

要數英超今季令人失望嘅球隊，除咗曼聯就輪到熱刺。呢支倫敦球隊今季掃入多名貴價兵，令人憧憬可以再次衝擊歐聯，點知佢哋上仗輸畀利物浦0:4後，歐聯夢幾近幻滅，依家要同曼聯爭奪下屆歐霸盃參賽資格。唔想連歐洲賽都冇得踢，熱刺今晚主場對新特蘭肯定主動出擊，嫌1.46倍主勝冇肉食，可以捧1.72倍入球大。

（now621台周二凌晨3:00直播）

熱刺上個月7仗僅2勝，睇番賽程都幾惡啃，包括喺歐霸盃兩戰賓菲加，聯賽惡鬥利物浦、車路士同阿仙奴，贏唔到都叫情有可原。好在佢哋對中下游隊依然算穩陣，順利砌低修咸頓同卡迪夫城，今仗對新特蘭應該係時候反彈。
艾迪巴約嗌隊友振作

雖然前鋒蘇爾達杜、守將維頓漢打柴，但有射手艾迪巴約復出掛帥。呢位多哥前鋒賽前透過官網鼓勵球隊振作：「我嘅目標係贏晒剩低嗰6場波。我知係唔容易，但呢度有一班出色嘅球員，我深信我哋一定做得到。」呢位射手踢法全面，有佢掩護中場基斯甸艾歷臣、基菲爾施古臣等人後上埋門，足以射爆近7場失16球嘅「黑貓」防線。
普耶領軍倒戈冇情講

熱刺要保住歐霸盃入場券，新特蘭何嘗唔係為英超席位而戰，領隊普耶表明即使自己以前効力過熱刺都冇情講。翼鋒阿當莊臣上仗打破入球荒，相信普耶唔敢再將呢位突破力強嘅快翼放喺後備席。事實上，呢支東北球隊作客踢得進取，近7場聯賽作客攻入12球，火力唔差。雖然射手史提芬費查、門將基倫韋斯活特續缺陣，但熱刺後防不時犯錯送禮，「黑貓」都唔驚冇「餐士」入波。
Data King：新特蘭作客對賽輸慣

‧新特蘭連續3場聯賽輸波，全部都喺半場已經落後對手。

‧熱刺近11次主場鬥新特蘭贏9場。

‧熱刺今季聯賽未試過喺比賽頭15分鐘入波。
乜都玩錦囊：吼埋2.15倍「主主」

雖然新特蘭要護級搶分，不過佢哋狀態認真差，近6場聯賽取得1和5負，5場敗仗全部都喺換邊前就已經落後，防守唔穩陣之餘，同時反映班波缺乏反超前嘅決心。睇番佢哋今季喺英超輸嗰17場比賽，當中13場已經喺上半場投降。若果大家今晚唔睇好「黑貓」可以搶到任何分數，不妨考慮吓2.15倍「主主」。