利禾奴輸親就2粒 祖記「讓和」好執

猪拉多纳

今晚意甲有「一哥」祖雲達斯主場迎戰弱旅利禾奴，矢志奪得歐霸盃冠軍嘅「斑馬兵團」，今仗會為周中嘅8強次回合留力，讓球主客和「-2」真係未必讓得起，一於冷敲3.95倍「讓和」博佢哋贏兩球啦！

（TVB301及廣東體育周二凌晨1:00直播）
留力歐霸盃收起泰維斯

家陣祖雲達斯喺意甲已經同次席嘅羅馬拉開一段距離，奪冠只係時間問題，今仗「斑馬兵團」喺全季不敗嘅主場出擊，對住近14次作客僅得1勝嘅利禾奴，照計贏就唔會贏得1粒咁少嘅，不過佢哋呢個星期會喺歐霸盃出戰里昂，所以事先張揚呢場會收起球隊神射手泰維斯，中場維達爾亦都停賽，火力難免減弱，要大炒多過兩球又真係唔係咁易。

至於對手利禾奴，佢哋近況持續低迷，近7場賽事只係贏過1場咁大把，雖然呢隊波火力唔差，未必話射唔穿祖記大門，但最大鑊嘅係後防曳到爆，近27場居然只係得1場可以保住清白之身，今晚睇怕好大機會延續近3次作客淨輸兩粒嘅走勢喇。