韋根搵米獻細

猪拉多纳

留力足總盃4強爆廠

今晚英冠加開快車，斯維亦趁機湊下熱鬧，其中韋根主場對米禾爾值得留意。由於韋根嘅升班附加賽資格都幾穩陣，嚟緊周日足總盃4強又要火併英超「兵工廠」阿仙奴，今仗留力乃人之常情，護級分子米禾爾作客強隊亦唔敢冒進，隨時悶戰一場，轉玩1.92倍入球細好過。

（周三凌晨2時45分開賽）

先睇吓聯賽榜，位列第5嘅韋根要爭取前二嘅直接升班席位相當困難，不過佢哋已甩開第7名嘅諾定咸森林9分，只要於剩番6輪正常發揮，要保住前六嘅升班附加賽資格並非難事。貴為上屆足總盃盟主，韋根嚟緊周日凌晨喺溫布萊嘅4強戰，雖遇上實力贏佢幾條街嘅阿仙奴，但後者啱啱慘敗畀愛華頓沉到爆，連億萬大軍曼城都打冧嘅韋根，梗係唔會放過追打落水狗嘅機會喇。

既然張附加賽入場券穩袋咁滯，今場聯賽只係對住護級分子米禾爾，為免球員受傷影響對阿仙奴之戰，主帥路斯拿隨時收起部分主力，勒住嚟踢等收工唔奇。

米禾爾現時排尾二，護級形勢水深火熱，因此每一分對佢哋嚟講都非常重要，尤其係作客一定以穩行先。
米禾爾作客死守求分

睇番米禾爾佢哋近8仗客場聯賽，有5場開出細盤，今仗面對「五哥」韋根必擺出鐵桶陣迎敵，務求先做好防守博偷雞，撞啱韋根心繫足總盃，戰意成疑，悶鬥悶之下唔慌多波入，斯維預料韋根頂盡小勝，但主W得1.45倍見到都唔開胃，寧願捧有1.92倍分頭嘅細盤。