柏斯托尼嗰球攞車命

猪拉多纳

今晚歐聯8強次回合激戰連場，先講車路士主場對巴黎聖日耳門，車仔主帥莫連奴公認係有料之人，但從首回合所見，佢哋後防甩漏多多，中堅泰利、加利卡希爾及防中大衞雷斯頻頻犯錯，呢啲唔係場邊嘅莫帥可以控制到，何況聖日耳門嘅卡雲尼、拿維斯、柏斯托尼等球星絕非善男信女，只要稍一不慎，便付出沉重代價，難怪賽後莫帥發晒爛渣喇。如果首回合Keep住輸1比2嘅話，相信車仔次回合有力贏1比0翻盤出線，可惜完場前畀柏斯托尼舞龍咁舞整多粒，非常攞命，度士認為車仔今仗可贏番場，不過唔多睇好佢哋可以淨勝兩球晉級。

另一場多蒙特主場迎戰皇馬，由於皇馬有3球在手，王牌C朗及加里夫巴利又有傷在身，況且過往作客「凶地」德國輸多贏少，「銀河艦隊」隨時傾向穩穩陣陣保住勝果，未必會去得好盡。
「蜜蜂兵團」會踢爭氣波

多蒙特有星級射手羅拔利雲度夫斯基復出，配合米希達利恩及馬高列奧斯打快速反擊，不容小覷，相信「蜜蜂兵團」會大踢爭氣波，今仗返主場應戰兼有得受讓咁着數，度士覺得讓球主勝值得一試。