拜仁點止贏兩粒

猪拉多纳

唔輕敵打真軍 曼聯好難偷雞

歐聯８強次回合，拜仁慕尼黑主場迎戰曼聯，曼聯首回合喺主場踢成1比1平手，踢出今季代表作，不過嚟到安聯球場係另一回事，拜仁教練哥迪奧拿吸取教訓後集中精神應付今仗，將會變招出擊，重現絕對控制嘅統治力，主場可以贏曼聯兩球或以上，讓球主勝熱到得1.57倍亦顯示莊家對拜仁嘅信心。

（有線61及64台周四凌晨2時45分直播）
小豬停賽影響輕微

拜仁首回合作客曼聯陣上確有輕敵之心，賽前心理準備不足，遇上決心搏殺，踢出超強體能壓迫嘅曼聯顯得方寸大亂，最終和波連哥迪奧拿都話滿意。吸取該役教訓後，哥迪奧拿喺聯賽對奧格斯堡前事先張揚，講明聯賽對佢哋嚟講經已結束，所以會畀陣中主力休息，派全副選上陣兼Hea踢輸波，為咗今場波甘願放棄不敗紀錄。拜仁上仗適應唔到曼聯嘅兇狠搶拚，但經過一周調整定當決賽嚟踢，返到安聯球場係佢哋嘅天下。

拜仁今仗有舒韋恩史迪加同查維馬天尼斯雙雙停賽，堤亞高艾簡達拿、梳頓沙基利、迪亞高干坦圖同史達基因傷缺陣，但後三者只係副選，何況仲有硬淨中堅丹迪停滿復出，對拜仁正選陣容基本上影響甚微，黑柴相信哥迪奧拿會變招，前線起用文迪蘇傑掛帥攻堅，主動出擊爭勝。
必須入波冇得死守

曼聯近期鬥心同成績都有起色，除首回合摸和拜仁外，聯賽亦錄得兩連勝，啱啱作客贏紐卡素亦只係半力出擊，不過對手實力太弱根本不可作準。相比起首回合陣容，左閘艾拉將會復出代替小將阿歷山大畢拿，費查會代替費蘭尼擔任防中，香川真司亦會得到機會，代替有傷在身嘅傑斯。不過喺尹佩斯長抖，球隊命脈嘅朗尼有傷在身，今仗就算紮住上陣，亦唔會喺最佳狀態。

基於今場作客一定要取得入球至有機會出線，曼聯教練莫耶斯賽前話唔會繼續踢醜陋足球，將會變招力爭出線資格，隨時益咗拜仁打反擊。曼聯本身人腳實力冇得同拜仁比，莫耶斯嘅調動能力亦唔係哥迪奧拿嗰皮，喺呢場出線關鍵大戰，作客安聯凶多吉少。
領隊Chit Chat

哥迪奧拿(拜仁慕尼黑)：今場係一場生死決戰，曼聯係世界上其中一支最佳球隊，我哋要好小心。雖然有作客入球在手，但1比1嘅比數其實好危險，絕對不能鬆懈。

莫耶斯(曼聯)：我唔覺上場我哋踢得好醜陋，戰術需要啫，嚟到次回合我哋需要改變，我正考慮今場會改踢乜戰術令我哋可以出線。
Player Browser：文迪蘇傑（拜仁慕尼黑前鋒）

雖然哥迪奧拿愛用無鋒陣，但首回合落後下都要派佢上陣，並即見成效。拜仁今仗將利用呢位克羅地亞鋒霸嘅力量型踢法去衝散曼聯防線。有佢牽制對手中堅，雙翼洛賓同列貝利將有更多活動空間。
韋碧克（曼聯前鋒）

首回合「單刀笠射」雖成為笑話，但其實佢全場表現唔錯，勤力跑動，並創造多次具威脅攻門。如果冇埋朗尼嘅曼聯作客拜仁只能採取穩守突擊。紅魔鬼今場要爭取作客入球就要睇吓「黑碧」有冇神來之筆。
歐聯密碼

0:曼聯過去4次作客拜仁錄得0勝。

09:哥迪奧拿連同球員生涯，9次對英格蘭球會全部不敗。

11:拜仁喺歐洲賽11次作客踢成1比1，次回合主場全部贏波。

07:拜仁首回合錄得7成控球率嘅絕對優勢。

142:如傑斯上陣，唔計外圍賽，將係佢第142場歐聯，追平魯爾最多紀錄。