馬體會拜仁優勢明顯

猪拉多纳

今晚歐聯8強次回合兩場大戰，細鬼認為兩支主隊都有明顯優勢，值得睇好。馬體會硬淨踢法完全剋住巴塞，今場主場兼仲有作客入球，預料中前場繼續逼搶外，更會進一步加固防線，捧入球細最啱數。至於拜仁對曼聯，拜仁今場返到主場就唔可以攞上場表現嚟做參考，贏曼聯兩球或以上唔係難事，讓球主勝好路。

先講西班牙內訌，馬體會教頭施蒙尼主張嘅體力化踢法搞到巴塞成班矮仔一戙都冇，巴塞一向以沙維、恩尼斯達、美斯呢幾個技術細膩嘅矮仔為重心，靠佢哋組織攻勢同入波，但佢哋嘅Tiki Taka踢法面對馬體會嘅「搶錢戰術」完全冇符，波都攞唔穩，何來組織攻勢？所以點解巴塞今季4次對住馬體會贏唔到不特止，仲要加埋先入得兩球。雖然馬體會今場冇咗射手迪亞高哥斯達，但唔會對球隊逼搶踢法有太大影響，最多都係攻力弱咗啲，但硬淨防守一樣封得死巴塞。
德甲敗績不能作準

另一場拜仁喺安聯主場對曼聯，佢哋上場德甲被破不敗金身，但明顯係為留力砌紅魔鬼，所以輸波不足作準。拜仁上場作客意外贏唔到曼聯，其實係班球員有少許輕敵，今場次回合關乎出線，佢哋唔會再敢放鬆，而且係人都知曼聯今季喺莫耶斯帶領下有幾多料，拜仁讓球主勝值得捧場。