拜仁遇龜縮紅魔搞唔掂

猪拉多纳

今晚歐聯8強次回合大戰，衞冕嘅拜仁慕尼黑喺安聯球場迎戰曼聯。兩隊同樣喺上場聯賽留力，但命運各異，近3場不勝嘅拜仁作客0:1負奧格斯堡，多項紀錄就此斷纜，士氣受挫。相反曼聯作客對紐卡素踢出本季代表作，全場製造多次有威脅埋門大勝4:0，對住一遇英格蘭球隊即腳軟嘅拜仁未必輸硬，一於冷敲4.15「讓客」

（有線61、64、201及203、中央5台周四凌晨2:45直播）
朗尼啪止痛針落場

首回合拜仁去到奧脫福受制於曼聯嘅「龜縮」踢法，就算贏晒控球率，具威脅埋門唔多，最尾幾經辛苦先憑舒韋恩史迪加取得重要嘅作客入球逼和紅魔。其實拜仁自從喺德甲封王後似乎有所鬆懈，雖然話聯賽主要出副選應戰啫，但後段都有換入一班正選熱吓身，連歐聯在內近3場不勝，上仗對奧格斯堡輸波搞到53場聯賽不敗紀錄就咁玩完，仲要係近60場以嚟首次入唔到波，踢到咁真係講唔過去囉！仲有呀，佢哋近4次主場迎戰英格蘭球隊都贏唔到，今晚一個唔小心隨時衰多鑊。

紅魔今仗有尹佩斯肯定缺陣，雖然有傷嘅朗尼好可能會為呢場關鍵大戰「啪」止痛針上陣，連哥迪奧拿亦深信佢會頂硬上，仲同記者打賭一杯啤酒。不過睇怕「魔童」狀態都未必好好，相信食髓知味嘅領隊莫耶斯會沿用首回合嘅鐵桶陣，經驗老到嘅中堅里奧費迪南同隊長尼曼查維迪更見重要。
小豬 馬天尼斯齊停賽

當然，莫帥今仗點運用香川真司同查維亞靴南迪斯相信會係關鍵，特別係香川真司効力多蒙特時累積唔少擊敗拜仁嘅經驗，首回合後備入替亦表現唔錯，落底博到角球造就尼曼查維迪入波。趁住拜仁兩個防守關鍵人物舒韋恩史迪加同查維馬天尼斯齊齊停賽，曼聯未必攻唔入拜仁，今場有力一戰o架！
Data King：兩隊勁開角球細

‧拜仁連續4場有失波。

‧雙方近3仗都係開角球細。

‧拜仁過去4次主場鬥曼聯錄2勝2和。
乜都玩錦囊：拜仁冇乜計捧埋入球細

紅魔未曾試過作客砌低拜仁，呢支德甲班霸首回合亦好似搵唔到咩路數隊死曼聯，中位數係3.5球嘅1.65倍細，甚至20倍0:0波膽都博得過。
首回合：拜客和1:1