賓菲加計質贏晒-1有保證

猪拉多纳

歐霸8強次回合大戰，賓菲加主場對阿爾克馬爾，上屆歐霸盃亞軍賓菲加喺聯賽接近封王，可全情投入爭歐霸，今場「里斯本雄鷹」雖然揸住首回合作客贏1比0優勢，但相信佢哋唔會咁衰仔玩死守到完場，客軍近排狀態唔係幾掂，賓菲加要喺自己地頭贏兩粒或以上唔難，讓球主勝捧得過。

（有線63台周五凌晨3時05分直播）

今季葡超重新洗牌，喺聯賽寫下3連霸偉業嘅波圖大跌Watt，「里斯本雄鷹」乘勢崛起，聯賽剩番4輪賽事，佢哋領先次席士砵亭7分，冠軍在望，依家可以全力爭歐霸。賓菲加上季喺歐霸盃決賽輸畀車路士攞亞軍，今屆捲土重來唔會放鬆，而且班球員亦冇可能會放鬆嚟踢，事關喺歐戰次回合絕地反擊成功出線嘅球隊比比皆是，賓菲加上場作客對阿軍贏得1粒唔算穩陣，今場一定想盡早鎖定勝局。
阿軍近七場僅得一勝

賓菲加本身人腳實力夠料踢歐聯，一對前鋒洛迪高摩連奴同洛迪高利馬更受到大球會青睞，後備又有復甦射手奧斯卡卡度素，攻力唔成問題，今場更有中場安素佩雷斯刑滿復出，「夫添」嘅賓菲加絕對有力大數近況唔掂嘅阿爾克馬爾，阿軍近七場只係贏得一場咁大把，上場喺主場都入唔到賓菲加，嚟到人哋地頭就更加難發圍，捧讓球主勝。