韋根小強上身拍極唔死

猪拉多纳

今個星期我要講下變變變生命力！大家都知道大自然界入面有好多昆蟲都有好強嘅生命力，當中嘅表表者就係小強；據說就算係原子彈試爆完嘅地方，唯一可以生存到嘅就係小強， 而且無論人類研究咗咁多千萬年，用幾多武力和武器， 始終都冇方法去滅絕小強。

我自己就好唔鍾意小強，但有隻小強其實好值得學習，就係足球界小強韋根。呢隻韋根適應力極強，就算冇晒主力，連領隊都冇埋，但喺足總盃一樣有成績，而且面對再強嘅武力都未驚過，英超最強攻力嘅曼城一樣要輸畀佢哋。
爭足總盃隨時贏埋阿仙奴

雖然依家韋根係英冠球隊，但有邊個敢話阿仙奴可以拍得死呢隻小強呢？如果佢呢個周末真係打贏埋阿仙奴，成功衞冕足總盃，我相信韋根嘅故事將會夠大家講足幾十年。今個星期我哋一齊睇實呢場變變變生命力之小強的故事。

（now 633及660周日凌晨零時07分直播）