祖雲達斯強「細」有計

猪拉多纳

里昂教頭未踢先認輸

意甲球隊喺今屆歐洲賽表現麻麻，目前只係得番祖雲達斯一隊仲留得喺歐洲戰場打拚。「斑馬軍團」喺歐霸盃8強首回合作客法甲里昂小勝1:0，今晚回師主場出戰次回合，晉級問題唔大。但睇番佢哋最近入波唔算多，又冇必要大炒對手，1.95倍入球細抵玩。

（有線61及201周五凌晨3:05直播）

祖雲達斯喺首回合憑住後防邦路斯嘅入球，成功揸住粒作客入球返都靈比賽，今仗大有條件歎慢板。「斑馬軍團」陣中只有翼鋒柏比、守將巴沙利倦勤，基本上可以強陣出擊，加埋佢哋個無敵主場，出線可謂十拿九穩。之不過佢哋近13戰只係得1場開出入球大，就知佢哋守得穩之餘，又唔會特別追求大勝，相信今仗志在平穩出線。
里昂傷兵滿營

里昂想晉級4強，今晚就一定要成為今季首支喺祖雲達斯新球場贏波嘅球隊。之不過強如皇家馬德里都做唔到，佢哋有幾多機會大家心照喇。主帥加迪賽前承認贏波要靠奇迹，仲話希望班年輕球員把握機會吸收多啲同強隊交手嘅經驗。就連教練都冇乜信心，想班波搏都幾難啦！

況且里昂陣中傷兵唔少，前鋒賓尼亞、中場哥古夫、加連尼亞同埋右閘米基爾盧比斯齊齊打柴，即使射手巴菲迪比高美斯上仗喺聯賽轟入個人第100球法甲「士哥」，今仗睇怕都係孤掌難鳴。
首回合：祖客勝1:0