天鵝撞車冇得剩

猪拉多纳

Sunday Driver特別醒！

「超級星期日」英超連場好戲，利物浦惡鬥曼城固然係焦點，相信車路士領隊莫連奴肯定想佢哋兩敗俱傷，不過「寸王」想漁人得利嘅話，今晚造訪史雲斯一定要做好本分搶3分。車路士啱啱躋身歐聯4強，全隊上下都士氣高昂，最重要係呢支倫敦勁旅出名係「禮拜日之王」，要剷除近況頹爆嘅「天鵝」冇難度，1.69倍客勝趁熱食！

車路士喺歐聯8強次回合絕地反擊，成功淘汰巴黎聖日耳門，由於「藍戰士」會喺本月23號同馬體會合演4強首回合，英超賽會尋日宣布，車路士主場鬥新特蘭場聯賽，會由原定嘅下周日推前一日喺禮拜六踢。西班牙《機密報》尋晚仲爆料話「藍戰士」已經同佢哋4強對手馬體會達成協議，用6,000萬歐元（約6.4億港元）啟動迪亞高哥斯達嘅買斷條款，開波前先挫對手銳氣。
車仔簽迪亞高哥斯達

「藍戰士」要應付兩條戰線加重負擔，加上今季大勇嘅夏薩特喺周中歐聯傷出，今晚肯定無緣鬥史雲斯，但Yennie一啲都唔擔心，事關喺歐聯戰場唔合乎上陣資格嘅穆罕默德沙拿、尼曼查馬迪，以及刑滿嘅拉美利斯今晚都可以悉數落場，大把人畀莫連奴調配吖！
史雲斯未試過贏車仔

再講，車路士每逢喺禮拜日出擊都特別醒神，對上12場周日英超賽事總共錄11勝1和佳績，堪稱「禮拜日之王」。反觀仲未脫離降班威脅嘅史雲斯，最近8場聯賽足足有7場失分，英超史上更加未試過砌低「藍戰士」，今晚有主場都難逃一敗。