爭踢歐聯唔衰得 畢爾包鬥志可加

猪拉多纳

今晚西甲有場獨腳戲，由畢爾包主場迎擊馬拉加。畢爾包為咗鞏固自己前4位置，以防來勢洶洶嘅西維爾搶走下屆歐聯入場券，肯定借地利主動出擊搶分，今次對住人腳不整嘅馬拉加，隨時大炒一場，2.15倍「讓主」唔好錯過。

（開賽時間：周二凌晨4:00）
馬拉加唔齊腳

今輪聯賽開始前，畢爾包以6分領先排第5嘅西維爾，不過後者近況大勇唔可以掉以輕心。為免夜長夢多，對畢爾包嚟講最好嘅方法就係繼續贏波，確保領先優勢。佢哋上場作客以2:1擊敗利雲特，射手阿度里斯打破入球荒之餘更「起孖」，加埋守將拿樸迪刑滿復出，攻守都予人信心。

對手馬拉加自從3月中有球迷不滿球隊戰績發動抗議後，班波隨即反彈取得4勝2負成績，依家佢哋護級壓力大減，心態或有所鬆懈。睇番佢哋贏嗰4場嘅對手，全部都係實力唔強嘅球隊，話唔埋又係虛火，而且中場法維奧費拉拿、杜達今仗停賽，連埋養緊傷嘅中場迪桑尼、後衞沙治奧辛捷士等人唔踢得，陣容不整，好難頂住畢爾包狂攻。