阿仙奴爭4哥喪扑錘

猪拉多纳

「法國雙塔」掂檔翻尋味

今晚英超補賽「褪色倫敦打吡」阿仙奴坐鎮主場迎戰「錘仔幫」韋斯咸，雖然前者剛喺足總盃4強鬥足百二分鐘兼射埋12碼先擊退韋根，但殺入決賽令士氣大振，況且佢哋一向食住韋斯咸，為「錢」途力爭前四嘅來屆歐聯入場券，主帥雲格必要時會派出「法國雙塔」基奧特同耶耶辛洛高嘅「復古式」雙鬼拍門扑「錘」，不妨直取2.02倍讓球主勝。

（now 621周三凌晨2時45分直播）

日前足總盃準決賽阿仙奴面對英冠仔韋根陷於苦戰，直至完場前8分鐘先追和，打埋加時都難分高下，最終靠門將法比安斯基神勇兩救極刑，才以互射12碼險勝，雖然消耗唔少體力，不過對於近況低迷嘅阿仙奴嚟講，進身足總盃決賽猶如打咗支強心針，令原本陷入信心危機嘅「廠仔」大為振奮。
韋斯咸冇「占哥」防線更危

阿仙奴主帥雲格一向崇尚地面進攻，就算打雙箭頭，通常會以影子前鋒夥拍技術型中鋒，例如柏金配亨利、尹佩斯拍艾迪巴約，不屑英式傳統高Q大棍打法，但上仗落後韋根嗰陣，「教授」放手一博讓基奧特入替，罕有地與法國同胞耶耶辛洛高組成雙塔，仲頻頻斬高波畀兩人去衝去撞，正係呢種「復古式」雙鬼拍門嘅狂轟猛炸，搞到韋根後防險象環生，間接造就梅迪薩卡門前扳平。

韋斯咸經過一輪瘋狂搶分後，同40分嘅護級安全線只差3分，現排11位已幾近上岸，與其同阿仙奴硬撼嘥彈藥，倒不如嚟緊出戰同級球隊水晶宮及西布朗先死過喇。相反阿仙奴以兩分落後畀「四哥」愛華頓，爭取來屆歐聯入場券形勢不妙，為「錢」途着想，今仗實在不容再失，雖然雲格好大機會用番基奧特打單箭頭，但若久攻不下，隨時會加埋耶耶辛洛高雙鬼拍門，撼散冇中堅占士哥連斯壓陣嘅「錘仔幫」，加上近6對賽全勝之餘，當中有5次贏兩粒或以上，擺明格食格，斯維認為讓球主勝博得過。