阿仙奴搏命扑「錘」爭前四

猪拉多纳

雲格落Order攞3分

「廠仔」搏命爭前四！今晚阿仙奴將會喺英超主場鬥同市球隊韋斯咸，「兵工廠」雖然啱啱喺英格蘭足總盃4強同韋根踢到互射12碼階段，但今場關係到佢哋來季嘅「歐聯錢途」，點都要搏埋最後一口氣，鬥志肯定旺盛，何況「錘仔幫」一向畀「廠仔」食住，想輸少粒都難啦，小妹撐阿仙奴個2.02倍「讓球主勝」！

（now621台周三凌晨2:45直播）

阿仙奴近況確實令人失望，除咗上仗喺足總盃4強鬥韋根，要苦戰到互射12碼先贏波進身決賽外，就連之前鬥車路士、曼城、愛華頓等英超前列球隊，都係全部贏唔到，結果被狀態大勇嘅「拖肥糖」反超前搶走個「四哥」位。
近7次對賽廠仔贏晒

喺地獄賽程失分唔緊要，今場阿仙奴終於對番啲較弱嘅對手，尤其係「廠仔」近7次對韋斯咸贏晒，今晚當然要延續「扑錘」傳統，咁啱主帥雲格尋晚都落Order，講明今季最新目標係英超4強加足總盃冠軍，自然要贏波振士氣啦！傷愈復出、上仗正選上陣嘅艾朗藍斯，狀態回復得七八成，即使基奧特被打入冷宮，但都有德國射手普多斯基同法國新星耶耶辛洛高孭起鋒線，火力靠得住。
韋斯咸防線3將齊養傷

對家韋斯咸唔單止做慣「廠仔私房菜」，最慘係佢哋今仗仲有「防線鐵三角」占士哥連斯、佐治麥卡尼同祖爾奧拜恩養傷，以阿仙奴嘅鋒力，要射穿呢條爛蓉蓉嘅防線唔難吖！咪忘記「錘仔幫」今季9次鬥曼城、利物浦、車路士同愛華頓呢啲前列強隊，僅得1和8負，今仗怕且難逃慘敗喇。
乜都玩錦囊︰睇往績玩埋入球大

阿仙奴過去4次鬥韋斯咸，都成功喺對手身上取得至少3個入球，可以預期今仗會一如以往咁開行火力狂轟對手。不過韋斯咸嘅高大中鋒安祖卡路爾亦隨時可以為阿仙奴帶嚟威脅，輸波都未必抬蛋，1.62倍入球大要趁熱食喇。
Data King︰兩軍碰頭至少入3球

‧阿仙奴近5場波都未能喺半場取得領先優勢。

‧「兵工廠」近10次主場賽事僅得1敗。

‧ 兩軍近4次碰頭都出現至少3個入球。