皇馬勢盛客勝捧盃！

猪拉多纳

巴塞黑氣纏身瓣瓣唔老利

今晚深夜西班牙盃決賽爆發國家打吡，巴塞與皇馬呢對冤家喺中立場馬斯泰拿球場決一死戰。賽事一場過定勝負，90分鐘賽和將會加時，再和就要互射12碼，正所謂好波不如好運，巴塞近期黑到冇朋友，輸波、內訌、傷兵乜都齊，連球王美斯都玩hea踢，士氣低落。相反「銀河艦隊」行運行到落腳趾尾，三線作戰愈踢愈順，就算王牌C朗未能趕及復出都唔赦你，寧買當頭起，斯維力撐皇馬客W捧盃而回，兼報聯賽遭雙殺之辱。

（now 632周四凌晨3時30分直播）
將帥不和美斯頹爆

正所謂人衰行路打倒褪，巴塞就係最佳例子，先被國際足協禁止於未來兩個轉會窗買人，再喺歐聯遭馬體會踢出局，球王美斯跑得少hea到爆，被寸「散步帝」，上仗爆冷輸畀CF格蘭納達令爭逐聯賽錦標處於劣勢，又爆出沙維同恩尼斯達等老臣不滿主帥馬天奴，後者喺更衣室已經冇晒話事權，連場失利搞到士氣低落，真係乜衰嘢都關佢哋事。

除此之外，巴塞亦陷入中堅荒，佩奧爾及馬斯巴查因傷缺陣，雖然有傳整親盆骨嘅碧基想頂硬上，但據報佢康復進度唔樂觀，馬帥或被迫要用馬斯真蘭奴拍住艾迪安奴呢對客串中堅撐場，加埋甩漏甚多嘅副選門將賓度，防線有幾個計時炸彈喺度，都咪話唔牙煙。反觀皇馬近排個勢就靚到暈，仲要有埋運。上月尾兩連敗諗住聯賽無望，點知趁住巴塞失分又升番上次席，上周中歐聯次回合早早輸兩粒，後防立立亂形勢不妙，最終又頂得住多蒙特嘅狂轟猛炸晉級，認真好彩。
C朗缺陣一樣夠贏

皇馬教練安察洛堤賽前肯定王牌C朗唔會上陣，不過就算佢唔出得都冇有怕，迪馬利亞移前夥拍賓施馬、加里夫巴利攻堅一樣掂，新金童艾斯高解凍後交到貨，實打殘巴塞條豆腐渣防線，加上沙治奧拉莫斯趕及復出鎮守後場，與黑氣纏身嘅死敵可謂差天共地。

現時馬會嘅冠軍賠率，「銀河艦隊」有1.95倍比巴塞更好分，純粹因為近年交手處於下風，但時移世易，皇馬依家個勢頭咁旺冇得拗頸，況且佢哋上次捧走西盃（2011年），就係喺馬斯泰拿球場擊敗巴塞，重返福地好大機會重溫舊夢，一於撐皇馬90分鐘解決巴塞，客W兼贏冠軍。
教練Chit Chat

馬天奴（巴塞隆拿）：我哋喺呢場決賽會繼續奮鬥，我哋要振作起嚟做到最好，今場大戰唔可以再犯錯，一定要畀球迷開開心心咁慶祝一下。

安察洛堤（皇家馬德里）：今日(周二)我發現C朗唔可以上陣，但我對球隊有信心，佢哋每次面對傷病都好積極。C朗受傷令球隊更加團結。