巴塞皇馬世紀大戰

猪拉多纳

宿敵爭盃有攻冇守

西盃決戰今晚爆發！巴塞隆拿同皇家馬德里兩大西甲勁旅，今晚喺中立場米斯泰拿球場合演今屆西班牙盃決賽，兩軍賽前都傳出唔少不利消息，雖然巴塞王牌美斯同尼馬可望及時復甦，至弊球隊兩大中堅齊齊打柴，隨時要靠久休嘅佩奧爾頂硬上。今季「遇強即屈」嘅皇馬則有C朗缺陣，依然仲有加里夫巴利等攻擊手孭飛。兩軍都有關鍵球員受傷，勝負難料，既然大家都攻強守弱，1.52倍入球大當然熱捧啦！

（now632台周四凌晨3:30直播）
巴塞冇中堅佩奧爾頂硬上

巴塞已經錄得2連敗，美斯亦似乎想喺世盃前留力搞到近期經常喺球場「失蹤」，但今場始終係盃賽決賽，對手仲要係死對頭皇馬，「球王」又點會唔為隻盃出盡全力先？唔好睇皇馬近期個勢咁好，查實後防一對住攻擊力強勁嘅球隊就即刻「現形」，除咗早前喺歐聯8強次回合作客多蒙特，受比比「自殺式回傳」所累淨輸兩粒，喺聯賽4鬥巴塞同馬體會夾埋亦失咗9球，「地上最強」想入波唔係難事。

不過巴塞後防傷兵問題亦非常嚴重，除咗碧基要抖多一段時間外，靚仔中堅馬斯巴查亦受傷患困擾，就算啱啱好番嘅佩奧爾向馬天奴自動請纓上陣，但「佩老大」始終年事已高兼缺乏比賽狀態，叫勉強好過布斯基斯客串中堅，不過就肯定冇晒以前「定海神針」嘅風範，何況尋晚有消息話，馬天奴始終唔敢用佢添。
皇馬冇C朗照喪入波

唔好以為C朗受大腿同左膝傷患困擾肯定缺陣，巴塞一定有着數。西班牙《機密報》爆料，葡萄牙名醫諾隆夏要求C朗最快要到歐聯4強次回合對拜仁先至復出，不過西班牙名宿艾比達就話，賓施馬絕對有能力喺呢個時候挺身而出，況且加里夫巴利、艾華路莫拉達等鋒將頻頻有士哥，「銀河艦隊」肯定唔會因為冇咗C朗就突然啞火，上仗大炒艾美利亞4蛋，就係好例子啦！今晚無論邊隊捧盃，都肯定係一場精彩「大」戰呀！
Data King：皇馬近戰例入3粒

‧巴塞及皇馬近6次交手，有5次至少出現3個入球。

‧皇馬近8戰有6場都至少攻入3球。

‧皇馬近8戰有5次開出入球大。
乜都玩錦囊：艦隊炸「小矮人」抵捧

巴塞近期戰績下滑，後防不穩係最大致命傷，今次連陣中唯一高佬中堅碧基都打柴，皇馬肯定喪用高空攻勢轟炸班「小矮人」，巴塞前面入埋分分鐘唔夠後面失，今場平手盤，捧2.08倍皇馬就最啱。