占士米拿專治黑貓曼城主場醒「-2」照殺

猪拉多纳

「阿占」拯救曼城爭標夢！「藍月亮」禮拜日晚作客輸畀利物浦，爭標形勢陷入被動，但唔代表佢哋奪冠夢碎，今晚英超返去惡到打橫行嘅主場，預計曼城王牌射手阿古路同「黑貓殺手」占士米拿都會擔正，對住攻又唔得守又唔掂嘅新特蘭，怕且會上演一場大屠殺，即使要讓到「-2」，2.05倍「讓主」都捧得過。

（now621台周四凌晨2:45直播）

曼城上場以2:3輸畀利物浦，家陣落後榜首嘅「紅軍」7分但踢少兩場，而且利物浦仲要對爭標勁敵車路士同搶分護級嘅水晶宮，剩番嗰4場聯賽並唔係食硬，咁當然，曼城想後來居上嘅話梗係要做好本分啦！「藍月亮」王牌耶耶托尼對「紅軍」一戰鼠蹊受傷，雖然領隊比歷連尼指佢極可能會提早收咧，不過耶耶托尼尋日就喺twitter講，會盡力爭取喺今季內復出，仲話感謝球迷支持，可見曼城上下爭標決心幾咁大。

冇咗「Yaya」係重大損失，不過曼城要數新特蘭依然綽綽有餘，大家有睇「利曼戰」嘅話，都見到後備入替嘅占士米拿喺邊線幾生猛，佢一落場就交咗個靚助攻，預計比帥今仗會派佢擔正。占士米拿職業生涯撕破最多次大門嘅球隊就係新特蘭（5球），佢嘅英超處子入球正正喺新特蘭身上攞到，正式係「黑貓殺手」。何況傷愈嘅阿古路上仗後備入替睇落Fit番晒，今晚擔正攻堅，由大衞施華同拿斯尼提供彈藥，呢隻「黑貓」邊有得剩吖？
新特蘭近5場聯賽輸晒

新特蘭近5場聯賽輸晒，即使要搶分護級都有心無力，最「騎呢」係領隊普耶已經走火入魔，近排搵司職翼鋒嘅阿當莊臣客串前鋒，根本同前線拍檔域咸、波連尼冇火花，況且「AJ」得隻私家左棍識踢波，對住曼城舊隊友想發威都難。再講，曼城今季主場入咗52球，以「黑貓」近5仗失12球嘅走勢嚟睇，今晚輸大鑊絕對唔出奇。
Data King：新特蘭冇前冇後

‧新特蘭英超客場4連敗，當中共失13球。

‧曼城今季主場入球量冠絕英超，15戰勁入52球。

‧「黑貓」近7仗僅入3球。