工體不敗！北京硬淨上盤折「箭」

猪拉多纳

工體不敗！北京國安（足智彩譯FC北京）係典型嘅地頭蟲，今晚响工人體育場迎戰來訪嘅廣島三箭，至少可以睇高半線，所以呢場亞冠盃F組大戰，不妨博吓北京讓平半嘅上盤。

（now670及672台周三晚7:30直播）

F組嘅形勢非常緊湊，北京、廣島及首爾3隊同得5分，帶頭嗰隊中岸水手領先優勢亦只得1分，依家剩番兩輪賽事，今晚F組兩場波都可以話生死戰，邊隊輸就會好被動，呢輪主場出擊嘅北京自不然會搏晒老命。

由往績去睇，北京以前3戰廣島取得1勝2和，佢哋最近5次响工人體育場踢亞冠盃，又係3勝2和保持不敗，由2013年到家陣，北京8次出戰日韓勁旅，一樣有2勝5和1負嘅佳績，證明佢哋已經躋身亞洲強隊行列，尤其喺工體打波更硬淨到爆。

但係北京都唔係冇弱點，首先張呈棟傷咗，新簽嘅陳志釗又唔打得亞冠盃，右中場個位可能要揾老將邵佳一頂檔，張辛听、郎錚亦啱啱至傷愈。最大問題係主帥文沙奴以保守出名，當年佢教西甲嘅西維爾都係因為唔夠進取，先至畀人炒魷魚，今場波輸就死咗一橛，唔排除佢老人家會舊病復發，主場都唔敢擺大頭去攻人，玩到尾只能夠險勝。
廣島踢亞冠盃唔掂

客軍廣島三箭呢兩年喺日職也文也武，不過去到亞冠盃就笠晒水，近兩年10場亞冠賽事得1勝5和4負，作客未贏過，更加未試過小組出線，牌面睇蝕晒章。但係佢哋班新人好似鹽谷司、野津田岳人愈嚟愈成熟，韓國後衞邊峻範又傷愈復出，今晚都有兩、三成機會守和嘅，所以玩北京2倍上盤就最保險，大不了咪輸一半囉。