拜仁強陣奏凱歌

猪拉多纳

講明德國盃都唔放過

一連兩晚上演嘅德國盃4強戲碼，今晚輪到拜仁慕尼黑迎戰乙組仔凱沙羅頓。拜仁日前喺「國家打吡」慘敗多蒙特，聯賽羞家兩連敗，體育總監森馬「解畫」德甲塵埃落定，將重心轉移盃賽可以理解，今場為咗印證言論，點可以唔「騷哥利」大勝晉級，辣讓兩球照捧1.52倍「讓主」！

（無綫翡翠台周四凌晨2:30直播）

拜仁上輪德甲主場出戰「國家打吡」，最後淨吞多蒙特3隻光蛋，創下自2008年以2:5不敵雲達不來梅後，近6年來主場最大敗仗，同時亦係名帥哥迪奧拿接掌後最差成績。

對於呢排嘅羞家表現，拜仁體育總監森馬解釋話，聯賽已經提前封王，將重心擺喺盃賽可以理解：「莫講話德國啦，相信全世界冇一支球隊會喺前後兩個周中都有關鍵比賽嘅時候，再嘥力喺攞咗冠軍嘅聯賽搏殺。」
凱沙傷兵滿營翼鋒加奧斯收咧

既然森馬將聯賽表現跌Watt歸咎喺盃賽身上，今晚德國盃呢項「重點」賽事，相信教頭哥迪奧拿唔單止會派遣強陣出擊，更會落柯打叫文迪蘇傑、湯馬士梅拿等球員盡數，事關佢哋今屆曾經炒起漢堡同漢諾威呢班德甲兵，今次對住凱沙羅頓呢支乙組仔，如果贏唔到三幾粒邊度似樣！

另邊廂，凱沙羅頓當打翼鋒馬素加奧斯喺接受膝部手術後提早收咧，即使幾名射手賓查古、艾迪素同奧斯恩都擁有德甲經驗，可惜佢哋全部年過30歲，活力已大不如前，放喺乙組級別都仲夠踢嘅，但用嚟撼比自己高幾班嘅拜仁，咪講笑啦！

雖然凱沙喺晉級過程淘汰過哈化柏林同利華古遜兩支德甲兵，距離決賽又只差一步，按道理球員點會唔搏命吖，但佢哋現時排喺德乙第4位，仍然要為搶分爭取升班附加賽資格而努力，喺聯賽同盃賽兩邊兼顧下，對於板櫈深度唔厚嘅佢哋負擔唔細，今場想搏都恐怕有心無力。
乜都玩錦囊：凱沙半場難大敗

凱沙羅頓近11場比賽雖然半場未試過領先，但其中5場「半輸」咁啱得咁蹺都開出「0:1」，而且佢哋今場作客越級挑戰德國班霸拜仁，肯定踢得保守，半場未必大敗，不妨小敲拜仁半場贏「1:0」嘅3.15倍波膽。
Data King：拜仁德盃愛大炒

‧拜仁慕尼黑今屆德國盃5場攻入19球。

‧凱沙羅頓今屆德國盃3場作客冇失波。

‧凱沙羅頓近11場半場從未領先，錄得6和5負成績。